DSM dári-dármek pen medıtsınalyq jabdyqtardyń saýdasyn rettemek
ASTANA. KAZINFORM — Densaýlyq saqtaý mınıstrligi dári-dármek pen medıtsınalyq buıymdardyń kóterme jáne bólshek saýdasyn júrgizý erejelerine túzetýler ázirledi.
Túzetýler normatıvtik bazany aǵymdaǵy Salyq kodeksine sáıkes jańartýǵa baǵyttalǵan jáne dárihanalar, bıznes nemese halyq úshin jańa shekteýler nemese qosymsha talaptar engizýdi kózdemeıdi.
Aıta keteıik, ózgerister tehnıkalyq jáne naqtylaýshy sıpatqa ıe. Negizgi maqsat — zańnamalyq normalarǵa siltemelerdi Qazaqstan Respýblıkasynyń Salyq kodeksiniń qazirgi redaktsııasyna sáıkestendirý jáne normatıvtik-quqyqtyq aktiniń ataýyn naqtylaý.
Mınıstrlikte atap ótkendeı, bul ózgerister dári-dármek pen medıtsınalyq buıymdardyń satylý tártibine áser etpeıdi jáne dárihanalyq uıymdar, jetkizýshiler nemese farmatsevtıkalyq naryqtyń basqa qatysýshylary úshin jańa mindetterdi engizýdi kózdemeıdi.
Sonymen qatar, túzetýler bıznes pen halyqqa qosymsha retteýshi nemese qarjylyq júkteme týdyrmaıdy.
Mınıstrlikte atap ótkendeı, normatıvtik qujattardy jańartý jumysy turaqty negizde júrgizilip keledi. Bul — densaýlyq saqtaý salasyndaǵy retteýdiń ashyqtyǵyn, zańdylyqty jáne zańnamanyń birkelki qoldanylýyn qamtamasyz etý úshin jasalyp otyr.
Daıyndalǵan ózgerister farmatsevtıkalyq salada turaqty jáne túsinikti quqyqtyq orta qalyptastyrýǵa baǵyttalǵan.
Qujat «Ashyq NQA» portalynda 4 maýsymǵa deıin jarııa talqylaýǵa qoıylǵan.
Esterińizge sala keteıik, buǵan deıin Densaýlyq saqtaý mınıstrligi keıbir dári-dármekterdiń shekti baǵasyn belgileý mehanızmin naqtylap jatqanyn habarlaǵan bolatyn.
Buǵan deıin memlekettiń júıeli qoldaýy men Densaýlyq saqtaý mınıstrligi júzege asyryp jatqan sharalardyń nátıjesinde Qazaqstandaǵy otandyq dári-dármek óndirýshileriniń úlesi zattaı kórsetkish boıynsha 39,8%-ǵa jetkenin jazdyq.
