DSM dári baǵasyn qalyptastyrý júıesin qaıta qaraıtyn boldy
ASTANA. KAZINFORM – Densaýlyq saqtaý mınıstrligi dárilik zattarǵa baǵa qalyptastyrý júıesin aýqymdy túrde qaıta qaramaqshy. Bul týraly vedomstvonyń baspasóz qyzmeti málim etti.
— Basty maqsat — preparattardyń baǵasyn tómendetý, olardyń qoljetimdiligin arttyrý jáne patsıentterdiń qarjylyq júktemesin azaıtý. Búginde Qazaqstanda shamamen 6 000 dárilik zat tirkelgen, — delingen habarlamada.
Mınıstrliktiń málimetinshe, shekti baǵany retteýdiń jańa tetigi memleket esebinen tegin beriletin dárilerge — TMKKK men MÁMS sheńberinde, sondaı-aq kóterme jáne bólshek saýda arqyly satylatyn preparattarǵa qatysty qoldanylady.
Ambýlatorııalyq jáne statsıonarlyq emdeýge arnalǵan tegin dárilerdiń tizbesinde baǵalar 19%-ǵa deıin, al bólshek saýda dárihanalaryndaǵy baǵalar 30%-ǵa deıin tómendeıdi.
Jańartylǵan tizbe mynalardy qamtıdy:
— 3475 dári-dármektiń jáne 2917 medıtsınalyq buıymnyń ataýy (TMKKK jáne MÁMS sheńberinde)
— 5936 preparat — kóterme jáne bólshek saýdaǵa arnalǵan
Baǵa tómendeýiniń ortasha kórsetkishteri:
— 2222 dári ataýy boıynsha — 18%-ǵa deıin
— 1847 medıtsınalyq buıym boıynsha — 14%-ǵa deıin
— dárihanalarda 5492 dáriniń ataýy — 30%-ǵa deıin
Sonymen qatar, dárilik zattyń saýda ataýyna belgilengen shekti baǵa sol preparatqa bekitilgen kóterme shekti baǵadan aspaıdy. Shekti baǵa dárilik zattyń shyǵarý túri, dozasy, kontsentratsııasy, kólemi men qaptamasy, sondaı-aq ólshem birligi eskerile otyryp esepteledi.
— Kóterme jáne bólshek saýdaǵa arnalǵan dárilik zattardyń baǵasy on referentti eldegi (Ázerbaıjan, Belarýs, Bolgarııa, Vengrııa, Qyrǵyzstan, Polsha, Reseı, Slovenııa, Túrkııa jáne Ózbekstan) óndirýshilerdiń shekti baǵa kórsetkishteriniń ortasha máni negizinde esepteldi. Bul úshin Navlin Price & Access Data halyqaralyq bazasynyń derekteri paıdalanyldy. Qazaqstanda óndiriletin dárilik zattarǵa shekti baǵa belgilegende, quramynda birdeı halyqaralyq patenttelmegen ataýy, shyǵarý túri, dozasy, kontsentratsııasy jáne kólemi bar ımporttyq balamalarǵa tirkelgen baǵalar eskeriledi, — delingen vedomstvo habarlamasynda.
Jańa tetik sheńberinde baǵaǵa turaqty monıtorıng júrgizilip, naryqtaǵy naqty jaǵdaıǵa sáıkestigi tekserilip otyrady. Bul — baǵalardyń sebepsiz ósýine jol berilmeıtinin jáne kez kelgen alypsatarlyq nemese negizsiz baǵa kóterý áreketteri jedel anyqtalyp, joıylatynyn bildiredi.
Jańa baǵa retteý tetigi eldegi dári-dármek naryǵyn ashyq ári tıimdi etip, medıtsınalyq kómekti qazaqstandyqtar úshin burynǵydan da qoljetimdi etedi.
Buǵan deıin habarlanǵandaı, Qazaqstanda dári-dármekti 100 kúnnen aspaıtyn merzimde tirkeıtin joba iske qosyldy.