DSM basshysy Qostanaıda soqqyǵa jyǵylǵan feldsherge qatysty pikir bildirdi
ASTANA. KAZINFORM — Densaýlyq saqtaý mınıstri Aqmaral Álnazarova Instagram-daǵy paraqshasynda atalǵan oqıǵaǵa qatysty pikir bildirdi.
Onyń sózinshe, halyqtyń densaýlyǵyn saqtaıtyn medıtsına qyzmetkerleriniń qyzmet barysynda, óz densaýlyǵyna qater tóndiretin oqıǵalary kóbeıip barady. Ol soqqyǵa jyǵylǵan feldsher qyzǵa óz tarapynan qoldaý bildiretinin atap ótti.
— Jaqynda ǵana Qostanaıdaǵy jedel járdem feldsherine shabýyl jasaldy. Shaqyrtýǵa kelgen jas qyzmetker — Anel Baımýrzınanyń uryp-soǵý saldarynan alǵan jaraqattarynan aýrýhanaǵa tústi. Anel Baımýrzınanyń otbasyna óz tarapymnan qoldaý bildire otyryp, bul jaǵdaıdyń nazardan tys qalmaıtynyn jetkizemin, — dep jazdy mınıstr.
Álnazarova shuǵyl medıtsına qyzmetkerleri adam ómiriniń asa qaýipti kezeńinde kómekke keletin jáne óz ómirinińde qaterine de mán berýge múmkindigi bola bermeıtin qyzmetkerler sanatyna jatatynyn aıtty.
Jergilikti atqarýshy organdardyń derekterine sáıkes 2019-2023 jyldar aralyǵynda elimizde qyzmettik mindetterin atqarý kezeńinde 158 medıtsına qyzmetkerleri zardap shekken. Onyń ishinde:
2022 jyly — 46;
2023 jyly — 80;
2024 jyly — 9 shabýyl tirkelgen.
DSM basshysy mundaı áreketke barǵandar ádil jazasyn alýy tıis ekenin aıtty.
— Medıtsına qyzmetkerleriniń qyzmettik boryshyn oryndaýy barysynda, olarǵa jasalǵan shabýyl, zorlyq-zombylyq áreketteri úshin qylmystyq jaýaptylyqty engizýge baılanysty depýtattardyń qoldaýyna súıendik. Mundaı áreketter erkindikti shekteýge jáne qoǵamnyń aıyptaýyna deıingi ádil jazasyn alýy tıis, — dep atap ótti Aqmaral Álnazarova.
Ol Densaýlyq saqtaý mınıstrligi óz ómirin qaterge tigip, basqalardyń ómirin saqtap qalatyn medıtsına qyzmetkerleriniń qaısarlyǵy men batyldyǵyn atap ótetinin aıtty.
— Dárigerler men meıirgerler, bul — Sizdiń densaýlyǵyńyzǵa kúndelikti qamqorlyq jasaıtyn, ýaqytpen, jeke ómirimen jáne qıyn jaǵdaılarmen sanaspaı kómekke keletin jandar. Densaýlyq saqtaý mınıstrligi óz ómirin qaterge tigip, basqalardyń ómirin saqtap qalatyn medıtsına qyzmetkerleriniń qaısarlyǵy men batyldyǵyn atap ótetin bolady. Áriptesterimniń óz mamandyǵyna adaldyǵy qoǵamǵa keńinen tanylyp, bárimizge úlgi bolýy tıis, — dep túıindedi mınıstr.
Eske salsaq, jaqynda qaıtys bolǵan naýqastyń týystary qostanaılyq jedel járdem feldsherin soqqyǵa jyqqanyn jazǵan edik.