DSM balalarǵa qajetti ınsýlındik pompa jetispeýshiligine qatysty túsinikteme berdi

ASTANA. QazAqparat - Qazaqstanda ınsýlındik pompaǵa muqtaj barlyq balalar onymen qajetti mólsherde qamtamasyz etilgen, dep habarlaıdy QR Densaýlyq saqtaý mınıstrliginiń baspasóz qyzmeti.

«Sondaı-aq, qajet bolǵan jaǵdaıda qorda paıdalanylmaǵan jańa pompalar jetkilikti. Aıta ketý kerek, jańa patsıentterge qajettilik týyndaǵan jaǵdaıda bıýdjet qarajatyna tımeı, jańa qurylǵylardy da satyp alýǵa múmkindik qarastyrylǵan», delingen habarlamada.

Nazar aýdaratyn jaıt, pompalar uzaq merzimge qoıylatyndyqtan (5 jyldan ary) qazirdiń ózinde qamatamasyz etilgen balalarǵa ony jıi satyp alýdyń qajeti joq.  

Mınıstrliktiń atap ótýinshe, jańa normatıvtik-quqyqtyq akt jobasy boıynsha  ambýlatorlyq qamtamasyz negizinde ınsýlındik pompa qoıylǵan 18 jasqa deıingi balalarǵa qurylǵyny aýystyrý jáne oǵan ketetin shyǵyndardyń barlyǵy memleket esebinen tegin qarastyrylǵan.

Aıta keterligi, búgingi tańda Qant dıabeti dıagnozy boıynsha esepte 2 162 bala men jasóspirim tirkelgen. 1 071-i 2012-2016 jyldar aralyǵynda pompamen qamtamasyz etilgen.