DSM balalardyń profılaktıkalyq tekserýleri men mektep medıtsınasynyń formatyn jańartpaq
ASTANA.KAZINFORM - Qazaqstan Respýblıkasy Densaýlyq saqtaý mınıstrligi mektep medıtsınasy sheńberinde balalardyń profılaktıkalyq tekserýlerin tolyq tsıfrlandyrýdy josparlap otyr, dep habarlaıdy mınıstrliktiń baspasóz qyzmeti.
Apparattyq keńes barysynda vedomstvo basshysy mektep jasyndaǵy balalardy profılaktıkalyq medıtsınalyq tekserýdiń qoldanystaǵy modeli jetkilikti deńgeıde tıimdi emestigin jáne formaldy sıpatta qalyp otyrǵanyn atap ótti. Qazirgi tańda basymdyq dıagnostıka sapasyna emes, sandyq kórsetkishterge berilip otyr. Qoldanystaǵy máselelerdi sheshý úshin profılaktıkalyq tekserýlerdiń qazirgi modelin ózgertý, nátıjelerdi óńdeýge arnalǵan tsıfrlyq sheshimderdi engizý, sondaı-aq fýnktsııalardyń bir bóligin orta býyn medıtsına qyzmetkerlerine berý kózdelip otyr.
-Beıindi mamandar tapshylyǵy men medıtsına qyzmetkerlerine túsetin joǵary júkteme bir balany qaraýǵa bólinetin ýaqyttyń qysqarýyna, ústirt dıagnostıkaǵa jáne densaýlyqtaǵy buzýshylyqtardy anyqtaý deńgeıiniń tómen bolýyna alyp keldi. Sonymen qatar erekshe bilim berý qajettilikteri bar balalar men múgedektigi bar balalardy esepke alý máselesi de ózekti kúıinde qalyp otyr», – dedi óz baıandamasynda Ana men bala densaýlyǵyn saqtaý departamentiniń dırektory Maǵrıpa Embergenova.
Balalardy profılaktıkalyq medıtsınalyq tekserý júıesin jetildirý maqsatynda bilim berý uıymdaryn tsıfrlyq elektrokardıograftarmen, pýlsoksımetrlermen, boı-ólsheýish jáne tarazylarmen, otoskoptarmen, sondaı-aq derekterdi avtomatty túrde jiberetin telemedıtsınalyq keshendermen jabdyqtaý josparlanyp otyr. Aldaǵy ýaqytta ıntraoraldy kameralarmen, plantograftarmen jáne avtorefraktometrlermen qosymsha jaraqtandyrý kózdelgen.
Mınıstr balalardyń profılaktıkalyq medıtsınalyq tekserýlerin tolyq tsıfrlandyrýdy jáne barlyq derekterdi Densaýlyq saqtaý mınıstrliginiń aqparattyq júıelerine ıntegratsııalaýdy, sondaı-aq balanyń elektrondyq densaýlyq pasportyn qalyptastyrýdy qamtamasyz etýdi tapsyrdy.
- Balalardyń densaýlyǵyna qatysty barlyq derekter júıeli túrde jınaqtalyp, taldanyp jáne adam ómiriniń barlyq kezeńinde súıemeldenýi tıis. Bul baqylaýdyń sabaqtastyǵyn qamtamasyz etip, aýrýlardy erte anyqtaýdyń tıimdiligin arttyrýǵa múmkindik beredi, – dep atap ótti vedomstvo basshysy.
A. Álnazarova 2026 jylǵy 1 qyrkúıekten bastap elimizdiń barlyq mektepterinde profılaktıkalyq tekserýler men mektep medıtsınasynyń jańartylǵan formatyn kezeń-kezeńimen engizýdi bastaý jóninde tapsyrma berdi.
Osyǵan deıin densaýlyq saqtaý mınıstrliginiń balalar lagerlerin «kenetten tekserý» formatyna kóshetini týraly jazdyq.
