DSM balalar onkologııasynda eń jıi kezdesetin aýrýlardy atady

ASTANA. KAZINFORM — Búgin 15 aqpanda Halyqaralyq balalar onkologııasymen kúres kúni atalyp ótedi. Bul kúrdeli emdeýden ótip jatqan balalarmen jáne olardyń otbasylarymen kún saıyn kúsh pen batyldyq tanytatyn yntymaqtastyq kúni, dep habarlaıdy DSM baspasóz qyzmeti.

Qazirgi zamanǵy medıtsına: ýaqtyly dıagnoz qoıý jáne durys tańdalǵan terapııa kezinde balalardyń onkologııalyq aýrýlarynyń edáýir bóligi emdeletinin dáleldeıdi.

Erte anyqtaý, mamandandyrylǵan kómekke qol jetkizý, balalar onkogematologııasyn damytý jáne halyqaralyq emdeý hattamalaryn engizý — ómir súrýdi arttyrýdyń negizgi faktorlary sanalady.

Qazaqstanda balalarǵa baǵdarlamalyq polıhımıoterapııany, ımmýndyq jáne targettik terapııany, kórsetilimder boıynsha hırýrgııalyq emdeýdi, onyń ishinde joǵary tehnologııalyq ádisterdi (býyndardy endoprotezdeý, selektıvti ıntraarterııalyq hımıoterapııa), sondaı-aq sáýlelik terapııany qamtıtyn keshendi kóp komponentti terapııa kórsetiledi.

— 2012 jyldan bastap elde gemopoezdik diń jasýshalaryn transplantattaý engizildi. Sońǵy 10 jyldyń ishinde syrqattanýshylyq kórsetkishi turaqty bolyp qalyp otyr jáne 100 myń balaǵa shaqqanda orta eseppen 9,7 jaǵdaıdy quraıdy. Balalardyń onkologııalyq aýrýlarynyń qurylymynda jiti leıkozdar (36%-dan astam), odan keıin ortalyq júıke júıesiniń isikteri (20%) jáne lımfomalar (7%) kósh bastap tur. Shamamen 6% neıroblastoma jáne germınogendi isikter. Nozologııalyq qurylym Eýropa elderiniń kórsetkishterine sáıkes keledi. Onkologııalyq aýrýlarmen kúres jónindegi keshendi jospar sheńberinde balalar onkogematologııasyn damytý boıynsha júıeli jumys júrgizilip jatyr, — delingen habarlamada. 

Elimizde dıagnostıka men emdeýdiń zamanaýı ádisteri: ımmýnogıstohımııa, ımmýnofenotıpteý, onkomarkerlerdi anyqtaý, súıekter men jumsaq tinderdiń sarkomalarynda joǵary dozaly hımıoterapııa, sondaı-aq 3D-modeldeý tehnologııalary men «ósip kele jatqan» endoprotezderdi qoldana otyryp aǵza saqtaıtyn operatsııalar engizildi. 

Nátıjeler men jetistikter: 

● jyl saıyn 556 tósek bazasynda 5 myńǵa jýyq bala em alady; 

● 2013 jyldan bastap 529 gemopoezdik diń jasýshasyn transplantattaý júrgiziledi; 

● kóz torynyń isikteri úshin 90-nan astam selektıvti ıntraarterııalyq hımıoterapııa operatsııasy jasaldy;

● jylyna 70-ten astam súıek kemigin transplantattaý jáne súıek isikteri kezinde 15 býyndardy endoprotezdeý júrgiziledi;

● onkogematologııalyq patologııasy bar balalardyń 5 jyldyq ómir súrý deńgeıi 70%-ǵa jetedi, bul álemdik standarttarǵa sáıkes keledi. 

Qazaqstanda qaterli isikteri bar balalardyń ortasha 5 jyldyq ómir súrý deńgeıi 71%-dan asady. Hodjkın lımfomasynda, retınoblastomada, germınogendi isikterde jáne jiti lımfoblastıkalyq leıkemııada bul kórsetkish 80%-dan asady. 

5 jyldan astam turaqty remıssııaǵa qoljetkizgen kezde bala qalpyna keldi dep esepteledi jáne dınamıkalyq baqylaýdan alynady. Jyl saıyn 500-den astam bala turaqty remıssııaǵa baılanysty baqylaýdan alynady nemese eresek onkologııalyq qyzmettiń baqylaýyna aýystyrylady. Aǵymdaǵy jyly elde protondyq terapııa, ıod terapııasy jáne tamyrlyq malformatsııalardy emdeý qoljetimdi bolady. 

Sondaı-aq, mı isikteri men qan tamyrlary patologııasyn emdeýge arnalǵan gıbrıdti operatsııalyq bólmeni («Qazaqstan Halqyna» QQ qoldaýymen) paıdalanýǵa berý josparlanýda, bul emdeýdiń tıimdiligin arttyrýǵa jáne asqyný qaýpin azaıtýǵa múmkindik beredi. Sátti emdeýdiń mańyzdy faktorlarynyń biri — balanyń ál-aýqatynyń mazasyz belgileri úshin erte emdeý qajettiligi. Balalar onkologııalyq qyzmetin damytý Qazaqstan Respýblıkasy densaýlyq saqtaý júıesiniń basym baǵyttarynyń biri bolyp qala beredi. 

Osyǵan deıin Jetisý oblysynda 7,5 myńnan astam onkologııalyq naýqas esepte turǵanyn jazdyq.