DSM balalar densaýlyǵyn nyǵaıtýǵa baǵyttalǵan «Bastaý» is-sharalar keshenin ázirlemek
ASTANA. KAZINFORM - Qazaqstan Respýblıkasy Premer-mınıstriniń orynbasary – Mádenıet jáne aqparat mınıstri A.Balaevanyń tapsyrmasy boıynsha Densaýlyq saqtaý mınıstrligi balalar densaýlyǵyn júıeli nyǵaıtýǵa jáne profılaktıkalyq medıtsınany damytýǵa baǵyttalǵan «Bastaý» keshendi baǵdarlamasyn ázirleýge kirisedi.
Densaýlyq saqtaý mınıstri Aqmaral Álnazarovanyń tóraǵalyǵymen ótken keńeste balalar densaýlyǵyn saqtaýdy damytýdyń negizgi baǵyttary qaraldy. Atap aıtqanda, mektep medıtsınasyn jetildirý, profılaktıkalyq tekserýlerdi tsıfrlandyrý, «Salamatty mektep» baǵdarlamasyn iske asyrý, sondaı-aq jazǵy saýyqtyrý naýqanyn uıymdastyrý máseleleri talqylandy.
Keńes barysynda «Salaýatty jaz – 2025» bastamasy aıasynda shalǵaı óńirlerde turatyn 365,5 myńnan astam balanyń profılaktıkalyq jáne saýyqtyrý sharalarymen qamtylǵany atap ótildi. Bıyl bul baǵyttaǵy jumys medıtsınalyq tekserýlerdiń qoljetimdiligi men qamtý aýqymyn keńeıtýge basymdyq bere otyryp jalǵasady.
Tsıfrlandyrý máselelerine erekshe nazar aýdaryldy. Atap aıtqanda, balalardyń elektrondyq densaýlyq pasporttaryn júrgizý densaýlyq jaǵdaıyn júıeli baqylaýǵa jáne qaýip faktorlaryn ýaqtyly anyqtaýǵa múmkindik beredi. Sonymen qatar ınfraqurylymdy damytý, onyń ishinde stomatologııalyq aýrýlardyń profılaktıkasy kabınetterin ashý jumystary jalǵasyp jatyr.
Mınıstr balalar densaýlyǵyn qorǵaý memlekettiń erekshe baqylaýynda ekenin jáne bul baǵyttaǵy jumystar Memleket basshysynyń tapsyrmasy boıynsha bastamashylyq etilgen «Qazaqstan balalary» baǵdarlamasy aıasynda júzege asyrylyp jatqanyn atap ótti.
«Bastaý» is-sharalar keshenin iske asyrý balalar arasyndaǵy aýrýlardyń aldyn alý men erte anyqtaýdyń turaqty júıesin qalyptastyrýǵa, sondaı-aq medıtsınalyq kómektiń qoljetimdiligin, onyń ishinde aýyldyq jáne shalǵaı óńirlerde keńeıtýge baǵyttalǵan.
Osyǵan deıin DSM balalardyń profılaktıkalyq tekserýleri men mektep medıtsınasynyń formatyn jańartatyny týraly jazdyq.
