DSM Azıadaǵa qatysýshylardyń jáne qonaqtardyń arasynda tumaýdyń aldyn alý jónindegi keshendi jumystardy jalǵastyrýda

Astana, Almaty qalalarynyń áýejaılarynyń jáne vokzaldarynyń, qonaq úı keshenderiniń, qoǵamdyq tamaqtaný kásiporyndarynyń sanıtarııalyq-gıgıenalyq jaǵdaıyn baqylaý kúsheıtildi. Bul týraly Densaýlyq saqtaý mınıstrliginiń baspasóz qyzmetinen habarlady.

Vedomstvo sondaı-aq elimizde 19-24 qańtar aralyǵynda tynys jolynyń jiti vırýstyq ınfektsııasy men tumaýdyń 40 840 jaǵdaıy tirkelgenin habarlap otyr. Bul byltyrǵy jyldyń sáıkes kezeńimen salystyrǵanda 1,6 esege tómen. Respýblıkanyń 16 óńiriniń altaýynda, atap aıtqanda, Almaty, Shyǵys Qazaqstan, Qaraǵandy, Qostanaı, Pavlodar oblystary men Almaty qalasynda tumaýratqandardyń sany, basqa óńirlerge qaraǵanda joǵarylaý. Naýqastardyń negizgi úlesin týǵannan bastap 14 jasqa deıingi balalar qurap otyr, olardyń úles salmaǵy 67,7 paıyzdy quraıdy.

Negizinen, aǵymdaǵy epıdemııalyq maýsymda V tıptegi tumaý vırýsy aınalymda júr. Ótken aptada 1789 naýqas aýrýhanaǵa jatqyzylǵan, bul tynys jolynyń jiti vırýstyq ınfektsııasy jáne tumaý dıagnozymen medıtsınalyq kómekke júgingen adamdardyń jalpy sanynyń 4,3 paıyzyn quraıdy.

Respýblıkanyń mektepke deıingi jáne jalpy bilim berý mekemeleri qalypty rejımde jumys isteýde.

Vaktsınatsııa tumaýdyń aldyn alýdyń eń tıimdi ádisteriniń biri bolyp tabylady, respýblıkada 2009-2010 jyldardaǵy epıdemııalyq maýsymda 464 400 adam egilse, búgingi tańda jalpy egilgenderdiń sany 848 067 adamdy qurap otyr.

Dúnıejúzilik densaýlyq saqtaý uıymynyń derekteri boıynsha Eýropanyń tórt elinde (Ulybrıtanııa, Irlandııa, Norvegııa jáne Danııa) tumaýmen aýyrýdyń deńgeıi joǵary, qalǵan elderde tumaýdyń epıdemııalyq belsendiligi ortasha qarqynda. Kórshi Reseıdiń soltústik óńirlerinde epıdemıologııalyq kórsetkish ortashadan joǵary.