DSM aýyldarda jedel járdemniń sapasyn jaqsartady

ASTANA. QazAqparat - Densaýlyq saqtaý mınıstrligi halyqqa shuǵyl medıtsınalyq kómektiń sapasy men qoljetimdiligin jaqsartý úshin vedomstvonyń «Jedel medıtsınalyq járdem, onyń ishinde medıtsınalyq avıatsııany tarta otyryp kórsetý qaǵıdalaryn bekitý týraly» 2023 jylǵy 19 qańtardaǵy buıryǵyna ózgerister engizdi, dep habarlaıdy QazAqparat.

Buıryqqa sáıkes jedel járdem brıgadasynyń quramyna paramedık – alǵashqy kómek kórsetý boıynsha qosymsha fýnktsııany oryndaı alatyn jáne shaqyrýlarǵa qyzmet kórsetý boıynsha jedel medıtsınalyq járdem brıgadalarynyń jumysyna qatysa alatyn alǵashqy kómek kórsetý boıynsha kásiptik daıarlyq kýrsynan ótken adam kiredi.

Halyqtyń sany 100 myń adamnan turatyn monoqalalarda jergilikti atqarýshy organdardyń qalaýyna qaraı derbes jedel medıtsınalyq járdem stansalary uıymdastyrylady.

Dárigerlik brıgadalardyń sany quramyna mamandandyrylǵan (dárigerlik), onyń ishinde balalar qarqyndy terapııa brıgadalary, beıindi brıgadalar (kardıologııalyq, pedıatrııalyq) kiretin brıgadalardyń jalpy sanynyń keminde 25% quraıdy.

Búginde elimizde 1500-ge jýyq jedel medıtsınalyq járdem brıgadasy jumys isteıdi, onyń 18% - mamandandyrylǵan dárigerlik brıgadalar.

Taldaý kórsetkendeı, qanaınalym júıesiniń aýrýlary men balalardaǵy aýrýlarǵa baılanysty qıyndyqtar jıi kezdesedi.

Sondaı-aq, jedel járdem stansalaryna medıtsınalyq aqparattyq júıelerge qoljetimdilik beriledi, bul úılestirýshi uıym úshin medıtsınalyq kómek kórsetýde ıntegratsııany qamtamasyz etedi.

«Jedel járdem stansalary 10 myń jáne odan az halyqqa shaqqanda bir brıgadanyń esebinen brıgadamen jaraqtandyrylatynyn, al medıtsınalyq-sanıtarııalyq alǵashqy kómek uıymdaryndaǵy JMK bólimsheleri halyqtyń ótinishin eskere otyryp, 35 myń jáne odan az halyqqa shaqqanda bir brıgadanyń esebinen brıgadamen jaraqtandyrylatynyn esterińizge salamyz» dep habarlady mınıstrlikten.

Dıspetcherlerdiń aýyldyq eldi mekenderdegi shaqyrýlarǵa qyzmet kórsetýi úshin aýdandyq qosalqy stansalarǵa mamandar, sondaı-aq jaqyn mańdaǵy medıtsınalyq uıymdardyń sanıtarııalyq avtokólikteri tartylýy múmkin.

Jergilikti atqarýshy organdardyń sheshimi boıynsha eldi mekenderde JMK fýnktsııalary birlesip oryndaý sharty arqyly berilýi múmkin.

Bul ınnovatsııalar JMK qyzmetiniń el halqyna shuǵyl medıtsınalyq kómek kórsetýdiń sapasy men qoljetimdiligin jaqsartýǵa múmkindik beredi.

Foto: gov.kz