«Kúmándi terapııa ókindiredi» – DSM aýtızmdi emdeýde naqty medıtsınaǵa júginýge shaqyrdy
ASTANA. KAZINFORM — Búgingi tańda áleýmettik jelilerde aýtızm dertine qatysty túrli qaýesetter tarap júr. Kóp jaǵdaıda jeli qoldanýshylarynyń pikiri «sap-saý týǵan bala vaktsınadan keıin sal bolyp qaldy» degenge saıady. Ózge de sebepterdi jeleý etken osyndaı málimdemelerge DSM jaýap berdi.
Áleýmettik jelilerde «aýtızmdi tolyq emdeý», «jalǵan aýtızm» jáne basqa da naqty emes teorııalar týraly qyzý málimdemeler kóbeıip keledi. QR Densaýlyq saqtaý mınıstrligi azamattardy osyndaı aqparatqa syn kózben qaraýǵa jáne tek dáleldi medıtsınaǵa senýge shaqyrady.
— Aýtızm spektriniń buzylystary (ASB) — bul halyqaralyq medıtsınalyq qaýymdastyq rastaǵan neırodamýdyń resmı tanylǵan ereksheligi. Aýtızm «tárbıeniń durys bolmaýynan», gadjetterden nemese vaktsınatsııalaýdan týyndamaıdy. Búgingi kúni aýtızmdi «tez jáne tolyq emdeýge» qabiletti ǵylymı dáleldengen ádis joq. Ǵajaıyp terapııalardyń, kúmándi dári-dármekterdiń jáne jalǵan ǵylymı ádisterdiń ýádeleri otbasylardy adastyryp qana qoımaı, kásibı kómek alý úshin asa qymbat ýaqytty joǵaltýǵa ákelýi múmkin, — dep habarlady vedomstvodan.
Bala úshin eń mańyzdysy — erte anyqtaý, ýaqtyly túzetý, mamandardyń súıemeldeýi jáne otbasynyń qatysýy bolyp tabylady. Balalardyń densaýlyǵy haıptyń, manıpýlıatsııanyń jáne jalǵan sensatsııanyń taqyryby emes.
Eske sala keteıik, buǵan deıin de Densaýlyq saqtaý mınıstrligi vaktsınatsııa men aýtızmniń baılanysy bar-joǵyn túsindirgen bolatyn.
