DSM: 265 myńnan asa qyz papılloma vırýsynan qorǵaldy
ASTANA. KAZINFORM — Qazaqstanda adam papıllomasy vırýsyna (APV) qarsy vaktsınatsııalaý memleket esebinen tegin júrgiziledi.
Vaktsına jatyr moıny obyrynyń aldyn alýdyń mańyzdy sharalarynyń biri sanalady. Bul týraly Almaty onkologııa ortalyǵynyń onkogınekology Asqar Aıdarov málimdedi.
Mamannyń aıtýynsha, vaktsınatsııalaý 11 jastaǵy qyz balalarǵa júrgiziledi, al ekpe ýaqytynda salynbaǵan jaǵdaıda ony 17 jasqa deıin qosa alǵanda alýǵa bolady. Vaktsına jatyr moıny obyrynyń jáne birqatar basqa da onkologııalyq aýrýlardyń negizgi sebebi sanalatyn APV-nyń eń qaýipti túrlerinen qorǵaıdy.
— Ýaqtyly júrgizilgen vaktsınatsııalaý vırýske tap bolǵanǵa deıin ımmýnıtet qalyptastyrýǵa múmkindik beredi jáne aýrýdyń damý qaýpin edáýir tómendetedi. APV-ǵa qarsy tegin vaktsınatsııalaý — búgingi tańda qyz balalardyń densaýlyǵyn saqtap, bolashaqta jatyr moıny obyrynyń aldyn alýǵa baǵyttalǵan mańyzdy memlekettik kepildik, — dedi maman.
Búgingi tańda 11–13 jas aralyǵyndaǵy 265,2 myńnan astam qyz bala vaktsınanyń birinshi dozasyn aldy, al 175,1 myńy ekinshi dozany qabyldap, vaktsınatsııalaý kýrsyn tolyq aıaqtady.
2026 jyldyń basynan beri: birinshi dozamen 51,4 myń qyz bala egildi; ekinshi dozamen 49,6 myń qyz bala egildi.
Sonymen qatar, Densaýlyq saqtaý mınıstrliginiń tapsyrmasy boıynsha 2026 jylǵy 13 mamyrdan bastap 14–17 jas aralyǵyndaǵy qyz balalardy erikti túrde vaktsınatsııalaý júrgizilip jatyr. Osy kezeńde vaktsınanyń birinshi dozasyn 32,2 myńǵa jýyq jasóspirim aldy. Vaktsına alǵandardyń arasynda vaktsınadan keıingi jaǵymsyz áseri tirkelmegen.
Budan buryn Kazinform tilshisi vaktsına alý mindet pe, tańdaý ma degen saýalǵa jaýap izdep, álemdik tájirıbeni saralap kórdi.
