DSÁM: Medıtsına qyzmetkerleriniń kásibı jaýapkershiligin saqtandyrý engizilýi múmkin

ASTANA. QazAqparat - QR Densaýlyq saqtaý jáne áleýmettik damý mınıstrligi medıtsına qyzmetkerleriniń kásibı jaýapkershiligin saqtandyrýdy engizýge nıetti. Vıtse-mınıstr Erjan Birtanov qateligi úshin bas bostandyǵynan aıyrylǵan eki dárigerge qatysty máselege oraı osyndaı pikir bildiredi.

«Qaza bolǵan áıelderdiń týystaryna shyn nıetimmen kóńil aıtamyn. Al dárigerlerge taǵaıyndalǵan jaza tym qatal dep sanaımyn.  Degenmen, bul sot sheshimi. Zańda belgilengen tártippen appelıatsııaǵa berý qajet», -dep jazdy ol Facebook paraqshasynda.

Budan bólek, vıtse-mınıstr problemany jan-jaqty taldaýǵa ýáde berip, «ásirese patsıentter ólimine nemese olardyń densaýlyǵyna zalal tıgizetin oqıǵalarǵa baılanysty medıtsına qyzmetkerleri áreketin baǵalaýdaǵy ádildik pen obektıvtilikke qol jetkizýge baǵyttalǵan» zańnamaǵa tıisti ózgerister engizýge kirisetinin aıtady.

«Dárigerler men medbıkeler áreketteriniń kásibı quzyreti men quqyqtylyǵyn baǵalaýda medqyzmetkerler qaýymdastyǵynyń rólin arttyratyn bolamyz. Medqyzmetkerlerdiń kásibı jaýapkershiligine saqtandyrýdy engizýge nıettimiz», - dep atap ótti ol.

Eske sala keteıik, buǵan deıin habarlaǵanymyzdaı 11 sáýirde Astana qalasynda №2 perınataldy ortalyqta bosaný barysynda ajal qushqan áıeldiń ólimine baılanysty dárigerlerge sot úkimi shyqqan bolatyn.