«Drýjba» qubyry boıynsha jetkizilim ózgerip, munaı balamaly baǵyttarǵa aýysty
ASTANA. KAZINFORM — Bıylǵy jylǵy mamyr aıynda «Drýjba» munaı qubyry júıesi arqyly Germanııaǵa («Shvedt» munaı óńdeý zaýyty) baǵyttalǵan tranzıt kestesi ózgertildi. Osyǵan baılanysty 260 myń tonna eksporttalatyn munaı kólemi josparly túrde qaıta bólinedi. Bul týraly Energetıka mınıstrligi málim etti.
— Endi munaı balamaly baǵyttar arqyly jetkiziledi. Ýst-Lýga portynan 100 myń tonna, al Kaspıı qubyr konsortsıýmynan (KQK) 160 myń tonna jóneltiledi. Tasymaldaý baǵyttaryn qaıta qurý júk jóneltýshilermen kelisildi jáne óndiristik qajettilik bolyp tabylady. Bul ózgerister munaı óndirýdiń jyldyq josparynyń oryndalýyna áser etpeıdi. Qoldanystaǵy kólik ınfraqurylymy eksporttyń turaqtylyǵyn qamtamasyz etip, shıkizatty álemdik naryqqa úzdiksiz jetkizýge múmkindik beredi, — dedi Energetıka mınıstrliginiń resmı ókili Ásel Serikpaeva.
Eske sala keteıik, buǵan deıin QR Energetıka mınıstrligi «Drýjba» munaı qubyry júıesi arqyly Germanııaǵa munaı tranzıtine qatysty BAQ-ta taraǵan aqparatqa túsinikteme bergen bolatyn.
Vedomstvo qazirgi ýaqytta reseılik taraptan Atyraý — Samara — «Drýjba» baǵyty boıynsha qazaqstandyq munaı tranzıtine qandaı da bir shekteýler engizilgeni týraly resmı habarlama túspegenin rastaǵan edi.
Alaıda RF vıtse-premeri mamyrdan bastap Qazaqstan munaıy Germanııaǵa «Drýjbadan» basqa baǵyttarmen jetkiziletinin málimdedi.
RF Energetıka mınıstrligi men «Transneft» kompanııasy aǵyndardy qaıta baǵyttaý boıynsha jumys istep jatqany naqtylandy.
