«Drýjba» arqyly munaı tranzıti qashan bastalady – Aqkenjenov jaýaby
ASTANA. KAZINFORM – Búgin Úkimet otyrysynan keıingi brıfıngte Energetıka mınıstri Erlan Aqkenjenov «Drýjba» munaı qubyry arqyly Qazaqstan munaıyn tasymaldaý qashan bastalýy múmkin ekenin aıtty.
- Qazirgi sátte Transneft kompanııasynan alǵan málimetke sáıkes, bizdiń úsh aılyq josparymyzda 0 kórsetkishi tur. Demek, aldaǵy úsh aıda «Drýjba» tarmaǵy arqyly tranzıtti jańartý ázirshe qarastyrylmaıdy, - dedi Erlan Aqkenjenov.
Bıyl mamyrda «Drýjba» munaı qubyry júıesi arqyly Germanııaǵa («Shvedt» munaı óńdeý zaýyty) baǵyttalatyn tranzıt kestesi ózgertilgen edi. Qazaqstannyń ulttyq munaı qubyry operatory «QazTransOıl» 2026 jyldyń basynan bastap tranzıt toqtatylǵanǵa deıin «Drýjba» qubyry arqyly Germanııaǵa 730 000 tonna munaı jetkizdi. Bul 2025 jyldyń sáıkes kezeńimen salystyrǵanda 353 000 tonnaǵa artyq.
Munaı jetkizý Reseı men Polsha arqyly qubyrdyń soltústik tarmaǵymen júzege asyryldy.
