Dropperlik arqyly tabys tapqan Oral turǵynyna sot úkimi shyqty
ORAL. KAZINFORM – Batys Qazaqstan oblysynda alaıaqtyq jolmen alynǵan aqsha qarajatyn aýdarý úshin bank shottaryn zańsyz paıdalanýǵa qatysty qylmystyq is boıynsha aıyptaý úkimi shyǵaryldy.
BQO boıynsha ekonomıkalyq tergep-tekserý departamentiniń baspasóz qyzmetinen málim etkenindeı, Oral qalasynyń jumyssyz turǵyny 2025 jyldyń kúzinde ońaı tabys kózin izdep, Telegram-kanaldardyń birinen jumys usynysyn tapqan.
Belgisiz kýrator oǵan aqshalaı syıaqy úshin bank shottaryn rásimdeýge jáne basqalardyń buǵan qol jetkizýine múmkindik berýge daıyn adamdardy izdeýdi usynǵan. Er adam óz qyzmeti úshin shottarǵa túsetin qarjy somasynyń 7 paıyzyn alýy tıis bolǵan.
Alynǵan nusqaýlardy oryndaı otyryp, ol syıaqy úshin bank shottaryn ashýǵa kelisetin azamattardy izdeı bastady. Solardyń biri – Oral qalasynda turatyn áıelge ekinshi deńgeıli bankterdiń birinde shot rásimdegeni úshin 30 myń teńge usynylǵan.
Uıaly telefondy paıdalana otyryp, er adam áıelge bank shotyn tirkeýge jáne beınetekserý protsedýrasynan ótýge kómektesip, bank qosymshasy men shot derektemelerine qol jetkizdi. Keıin bul málimetter shemany uıymdastyrýshyǵa Telegram messendjeri arqyly berilgen.
Sol kúni ashylǵan shotqa ınternet-alaıaqtardyń qurbany bolǵan jábirlenýshiden 500 myń teńge túsken. Er adam aldyn ala kelisilgen 35 myń teńge kólemindegi syıaqysyn ózine alyp qalyp, qalǵan 465 myń teńgeni qylmystyq shemany uıymdastyrýshyǵa beredi.
Sot er adamdy kináli dep tanyp, oǵan jazanyń búkil merzimine probatsııalyq baqylaý belgileı otyryp, 3 jyl 6 aıǵa bas bostandyǵyn shekteý jazasyn taǵaıyndady.
– Bul qylmystyq is dropperlik dep atalatyn áreketke qatysý tabys tabýdyń zııansyz tásili emes ekenin taǵy da dáleldeıdi. Bank shottaryn, kartalardy jáne mobıldi bankıngke qoljetimdilikti qylmyskerlerge berý ınternet-alaıaqtyqtardyń jasalýyna septesedi jáne qylmystyq jaýapkershilikke ákeledi. Azamattar banktik kartany rásimdep berý nemese óz shottaryna qoljetimdilikti usyný arqyly ońaı aqsha tabýdy ýáde etetin usynystardyń kóbi qylmystyq shemalardyń bir bóligi ekenin este saqtaýy qajet. Buǵan qatysqan adamdar alǵan syıaqysynyń mólsherine qaramastan, qylmysqa sybaılas qatysýshy retinde jaýapkershilikke tartylýy múmkin, – dep habarlady vedomstvodan.
Eske sala keteıik, budan buryn krıptoaıyrbastaý arqyly 155 mln teńge zańsyz tabys tapqan Oral turǵyny sottalǵanyn jazǵan edik.
