Dropperler arqyly 600 mln teńgeden astam aqsha aýdarǵandar sottaldy
ASTANA. KAZINFORM – Qyzylorda oblysynda krıptovalıýtany zańsyz aıyrbastaýdy uıymdastyryp, qylmystyq jolmen alynǵan aqshany zańdastyrǵan adamdar sottaldy.
Tergeý barysynda olardyń tıisti ruqsatsyz, «Astana» halyqaralyq qarjy ortalyǵynyń saýda alańdarynan tys jerde Binance platformasynyń P2P qyzmeti arqyly krıptovalıýtany zańsyz saýdalaǵany anyqtaldy.
Osylaısha olar 1 mlrd teńgeden astam somaǵa tsıfrlyq aktıvter satqan. Krıptovalıýtany zańsyz aıyrbastaýdan túsken tabys 178 mln teńgege jetken.
Sonymen qatar sottalǵandardyń biri esirtki satýdan túsken aqshany zańdastyrýmen aınalysqan.
Aqshany qabyldaý jáne basqa shottarǵa aýdarý úshin ózderiniń bank shottaryn paıdalanýǵa bergen adamdardy (dropperlerdi) tartqan.
Osy shottar arqyly 600 mln teńgeden astam aqsha aýdarylǵan.
Túsken aqsha krıptovalıýtaǵa aıyrbastalyp, esirtki saýdagerleriniń krıptoámııandaryna jiberilgen. Tergeý anyqtaǵan mundaı aýdarymdardyń jalpy kólemi 277 myń USDT-ge jetken.
Sottalǵandar qylmystyq jolmen tapqan aqshasyna júk kólikteri men tirkemeler satyp alyp, olardy jaqyn týystarynyń atyna tirkegen. Keıin bul kólikterdi kásipkerlik maqsatta paıdalanyp, zańdy tulǵalarǵa jalǵa bergen.
Sot úkimimen olardyń birine úsh jyl, ekinshisine eki jyl merzimge bas bostandyǵyn shekteý jazasy taǵaıyndaldy. Sondaı-aq tórt arnaıy tehnıka men qylmystyq jolmen alynǵan 1 mlrd teńgeden astam tabys memleket paıdasyna tárkilendi.
Úkim zańdy kúshine endi.
Aıta ketelik SQO-da 120 sheteldik dropper anyqtalǵan edi.
