Drondardyń ushýyn reglamentteıtin zań qajet - QR IDM
ASTANA. QazAqparat - QR Investıtsııalar jáne damý mınıstrliginde birqatar tehnologııalyq jańalyqtardy júzege asyrý josparlanyp jatyr, dep habarlaıdy QazAqparat tilshisi.
«Byltyr Qazaqstanǵa alǵash ret Halyqaralyq azamattyq avıatsııa uıymynyń (ІSAO) bas hatshysy Fan Lıý kelgen bolatyn. Kezdesýde azamattyq avıatsııany damytý perspektıvalary talqylandy. Ol qazir álemde ushqyshsyz ushaqtar synaqtan ótkizilip jatqanyn, 5-7 jyldan keıin jasandy ıntellekt basqaratyn alǵashqy ushaqtar áýege kóterilýi múmkin ekenin aıtty», - dep jaýap berdi vedomstvonyń baspasóz qyzmeti redaktsııanyń jazbasha saýalyna.
Mınıstrlik ókilderi «avtomobıl men ushaqtyń qospasyn» jasaý josparlary týraly aıtty.
«Bul tehnologııalardy jasaý ázirge bizge múmkin bolmaı otyr. Biraq birneshe jyl buryn fantastıka bolǵan drondar qazir úırenshikti dúnıege aınaldy. Olar shalǵaıdaǵy aýyldarǵa hat-habar almasýǵa múmkindigin berip, barýy qıyn jerlerdi sýretke túsirý, t.b. maqsattarǵa paıdalanylyp jatyr. Biz zańnamaǵa drondardyń ushýyn reglamentteıtin túzetýler engizýimiz qajet», - deıdi QR IDM ókilderi.
Vedomstvo baspasóz qyzmetindegilerdiń aıtýynsha, tolyqqandy ushý apparatynyń naqty salmaǵy men ólshemderin belgileý úshin ony qalada paıdalaný erejelerin qaraý qajet. Al mundaı máselelerdi sheshý úshin joǵary bilikti mamandar qajet.
«Jańa qurylym aıasynda ushqyshsyz ushaqtarmen jumys jóninde arnaıy basqarma qurý, kadrlardy daıarlaý jáne sertıfıkattaý úshin shetelderden aldyńǵy qatarly mamandardy shaqyrý múmkindikteri týyndaıdy», - deıdi sarapshylar.
