Drondardy zańsyz qurastyryp, qarý retinde qoldanýdyń jazasy qatańdatylady

ASTANA. KAZINFORM — Oblystyq jáne respýblıkalyq mańyzy bar qalalardyń aýmaǵyndaǵy memlekettik kúzet baqylaýyna berilgen mekemelerdiń ústinen dron ushyrýǵa shekteý engizýdiń erejesi ázirlenip jatyr. Premer-mınıstr Oljas Bektenovtiń Májilis depýtatynyń saýalyna joldaǵan jaýabynda osyndaı málimet aıtylǵan. 

— Qazir quqyq qorǵaý organdary arnaıy jáne ózge de múddeli memlekettik organdardyń qatysýymen PUA-ny zańsyz qurastyrǵany jáne qarý retinde qoldanǵany úshin ákimshilik jáne qylmystyq jaýapkershilikti qatańdatý baǵytynda sharalar ázirlep jatyr. Sondaı-aq Qorǵanys mınıstrligi PUA ushýyn retteý men baqylaýdy qamtamasyz etý úshin UFZ (oblystyq jáne respýblıkalyq mańyzy bar qalalar aýmaǵynyń ústinen PUA ushýyna arnalǵan arnaıy aımaqtar) jáne UARU (memlekettik kúzetke jatatyn obektilerdiń ústinen UÁK ushýyn shekteý aımaqtary) aımaqtaryn belgileý boıynsha jumysty jalǵastyryp jatyr, — deıdi Úkimet basshysy.

Qoldanystaǵy zańnamada pılotsyz ushatyn apparatty zańsyz ushyrý arqyly áýe keńistigin paıdalaný tártibin buzǵan jeke tulǵalarǵa 10 aılyq eseptik kórsetkish (39 320 teńge), laýazymdy tulǵalarǵa 20 AEK (78 640 teńge) aıyppul salynady.

Eske salsaq, maýsym aıynda Syrtqy ister mınıstrliginiń resmı ókili Aıbek Smadııarov Reseıdi ábigerge salǵan pılotsyz ushatyn apparattar Qazaqstan aýmaǵynan ushyryldy degenge saıatyn alyp-qashpa áńgimelerge jaýap bergen edi.