Dron shabýylyna baılanysty Ózbekstan ushaqtarynyń Reseıge reısi keshigip jatyr

TAShKENT. KAZINFORM — Kúsheıtilgen qaýipsizdik sharalaryna baılanysty Reseı tarapy ózbekstandyq ushaqtardy qabyldaýdy keıinge shegerdi, dep habarlaıdy Kazinform agenttiginiń menshikti tilshisi.

Uzbekistan Airways kompanııasynan málim etkendeı, keshe túnde dron shabýylyna baılanysty Reseıdiń birqatar áýejaıy jumysyn toqtatty. Tıisinshe, ózbekstandyq ushaqtardyń reısi keshigip jatyr. 

Aıta keteıik, qazirgi ýaqytta Máskeý, Vladıkavkaz, Groznyı, Magas jáne Mahachkala áýejaılaryndaǵy qaýipsizdik sharalary kúsheıtilgen.

Sáıkesinshe, Qarshy-Máskeý reısin oryndaǵan ushaq Novgorodtaǵy qosalqy áýejaıǵa baǵyttaldy. Sondaı-aq, Máskeý — Samarqand, Máskeý — Ferǵana, Tashkent — Mahachkala — Tashkent, Tashkent — Groznyı — Tashkent reısteri keshigedi.

Qosa ketsek, taıaýda Tashkent — Oral baǵytynda jańa áýe reısi ashylatynyn jazyp edik.

Munymen birge, jeltoqsannan bastap Túrkistannan Ózbekstannyń úsh qalasyna jańa áýe reısi iske qosyldy.