Dron nemese pılotsyz apparattardy ushyrý úshin qaı mekemeden ruqsat alý kerek

NUR-SULTAN. QazAqparat – QazAqparattyń resmı saýalyna QR Indýstrııa jáne ınfraqurylymdyq damý mınıstrligi Azamattyq avıatsııa komıteti jaýap berdi, dep habarlaıdy QazAqparat tilshisi.

«Qazaqstan Respýblıkasy Úkimetiniń 2011 jylǵy 12 mamyrdaǵy № 506 qaýlysymen bekitilgen QR Áýe keńistigin paıdalaný erejeleriniń 32-tarmaǵyna sáıkes, paıdalanýshylar ushqyshsyz apparattardy ushyrý ruqsatyn Qazaqstan Respýblıkasy Qorǵanys mınıstrliginiń Áýe qozǵalysyn basqarý ortalyqtarynan ala alady. Sonymen qatar, kúzetiletin nysandardyń ústinen ushyrý jaǵdaıynda ol ruqsatty QR Memlekettik kúzet qyzmeti keminde 5 jumys kúni ishinde maquldaıdy», - dep habarlady komıtetten.

Sonymen qatar, vedomstvo 2019 jyldyń basynan beri pılotsyz ushý apparattaryn ruqsatsyz ushyrǵany úshin 6 paıdalanýshy aıyppul salynǵanyn habarlaıdy.

Azamattyq avıatsııa komıteti sonymen qatar, Nur-Sultannyń Esil aýdanynda «Geomarksheıder» kompanııasy joǵaltqan «Geoscan 101» pılotsyz ushý apparatyna qatysty túsinik berdi.

«Qazaqstan Respýblıkasy Úkimetiniń 2011 jylǵy 4 qarashadaǵy № 1296 qaýlysymen bekitilgen erejelerge sáıkes, jolaýshylar men avıatsııalyq ekıpajdardy izdestirý jáne qutqarý boıynsha júrgiziletin is-sharalar kesheni mindetti túrde júrgiziledi. Al pılotsyz ushý apparatyn joǵaltqan jaǵdaıda ony izdep tabý - paıdalanýshynyń óz mindeti», - degen jaýap keldi komıtetten.

Aıta ketý kerek, «Geomarksheıder» kompanııasy joǵaryda atalǵan ushý apparatyn qaıtarǵan nemese tapqan adamǵa 100 myń teńge kóleminde syıaqy bergeli otyr.