Dron kókten baqylaýda: Qostanaı oblysynda 55 júrgizýshi ereje buzǵan
ASTANA. KAZINFORM — Qostanaı oblysynda polıtsııa qyzmetkerleri drondardyń kómegimen bir apta ishinde jol qozǵalysy erejesin buzýdyń 55 faktisin anyqtady, dep habarlaıdy Polisia.kz.
Quqyq buzýshylyqtardy anyqtaý úshin polıtsııa ushqyshsyz ushý apparattaryn (BPLA) paıdalanǵan.
Anyqtalǵan faktilerdiń qatarynda qarsy qozǵalys jolaǵyna shyǵý, baǵdarshamnyń tyıym salatyn sıgnalyna ótý, jaıaý júrginshilerdiń joldan ótý erejesin buzýy jáne manevr jasaý kezinde burylys kórsetkishterin qospaý bar.
Polıtsııanyń málimetinshe, drondardy paıdalaný joldaǵy jaǵdaıdy baqylaýǵa jáne júrgizýshiler men basqa da jol qozǵalysyna qatysýshylar tarapynan jasalǵan zań buzýshylyqtardy der kezinde anyqtaýǵa múmkindik beredi.
Quqyq qorǵaý organdary júrgizýshilerdi jol qozǵalysy erejelerin qatań saqtaýǵa shaqyrdy.
— Joldaǵy jaýapkershilik — ár adamnyń qaýipsizdiginiń kepili, — dep atap ótti polıtsııa.
Osyǵan deıin el boıynsha jol júrisi qaǵıdalaryn buzýdyń 20 myń faktisi drondardyń kómegimen anyqtalǵanyn jazǵanbyz.
