Drezdende kóne bomba tabylyp, 18 myń adam evakýatsııalanatyn boldy
ASTANA. KAZINFORM – Germanııanyń Drezden qalasynyń ortalyǵynan Ekinshi dúnıejúzilik soǵys kezindegi jarylmaı qalǵan bomba tabylýyna baılanysty búgin shamamen 18 myń adam evakýatsııalanady. Bul týraly jergilikti ákimshilik óziniń resmı saıtynda habarlady.
– 2026 jylǵy 10 naýryzda burynǵy Karolabrıýkke kópiri mańyndaǵy eki kúmándi ýchaskeni tekserý barysynda bomba tabyldy. Oq-dárilerdi zalalsyzdandyrý qyzmetiniń tekserýinen keıin onyń jarylǵysh qurylǵysy bar, salmaǵy 250 kılogramm bolatyn bomba ekeni anyqtaldy. Ony mindetti túrde zalalsyzdandyrý qajet, — delingen habarlamada.
Jarylmaı qalǵan snarıadty zalalsyzdandyrý jumystary 11 naýryzǵa josparlanǵan. Qala tarıhynda bul — Ekinshi dúnıejúzilik soǵys kezindegi bomba tabylýyna baılanysty júrgizilip otyrǵan eń aýqymdy evakýatsııa.
Shamamen 18 myń turǵyn, sondaı-aq jumysqa kelgen adamdar men týrıster snarıad tabylǵan orynnyń aınalasyndaǵy radıýsy 1 shaqyrym bolatyn qorshaý aımaǵynan dereý shyǵyp ketýi tıis.
Bul aımaqta Drezdenniń týrıster arasynda tanymal kórikti oryndary ornalasqan. Sonymen qatar munda polıtsııa basqarmasy, jer parlamenti (landtag), birneshe mınıstrlik, qarttar úıleri, balabaqshalar jáne basqa da áleýmettik mekemeler bar.
Ýaqytsha ornalastyrý pýnkti Messe Dresden kórme kesheninde ashylady.
Jarylmaǵan snarıadtar buryn qulaǵan Karolabrıýkke kópirin qaıta salý josparlanǵan aýmaqta tabylǵan. Ótken jyly osy kópirdi demontajdaý jumystary kezinde de tórt bomba tabylǵan eken. Tamyz aıynda olardy zalalsyzdandyrýǵa baılanysty 17 myń adam evakýatsııalanǵan.
Eske sala ketsek, byltyr Germanııada Ekinshi dúnıejúzilik soǵys kezindegi bomba jarylyp, 58 adam jaraqat aldy.