Drezdende eki adamdy tutqynǵa alǵan qylmyskerdiń kózi joıyldy
ASTANA. QazAqparat – Germanııanyń Drezden qalasyndaǵy «Altmarkt-Galerie» saýda ortalyǵynda 10 jeltoqsan kúni tańerteń eki adamdy tutqynǵa alǵan qylmyskerdiń kózi joıyldy. Bul týraly QazAqparat tilshisi DW aqparat portalyna silteme jasap habarlaıdy.
Shabýyl jasaǵan er adam tutqyndardy qutqarý arnaıy operatsııasy kezinde jaralanyp, keıin kóz jumdy. Polıtsııanyń aldyn ala málimetine sáıkes, qylmysker psıhıkalyq dertke shaldyqqan bolýy múmkin.
Málim bolǵandaı, 10 jeltoqsan kúni tańerteń qarýlanǵan er adam jergilikti «Radio Dresden» radıostantsııasynyń ǵımaratyna basyp kirmek bolǵan. Ol kireberistegi basty esikke oq jaýdyrǵan, alaıda ishke ene almady. DW portalynyń málimetinshe, radıostantsııa qyzmetkerleri qaýipsiz jerge qashyp úlgergen. Keıin ol kólikpen qala ortalyǵyna baryp, «Altmarkt-Galerie» saýda ortalyǵyndaǵy sharýashylyq taýarlaryn satatyn dúkenniń birine jasyrynǵan.
Osyǵan baılanysty saýda ortalyǵy men onyń mańyndaǵy aýdan turǵyndary evakýatsııalandy. Qaýipsizdik maqsatynda Rojdestvo merekesine arnalǵan taýarlar satylatyn jaqyn jerdegi bazar jabyldy.
Artynsha Drezden polıtsııasy qalanyń Prolıs aýdanyndaǵy kópqabatty úılerdiń birinen 62 jastaǵy áıeldiń máıiti tabylǵanyn habarlady. Quzyrly organ bul ólimge marqumnyń 40 jastaǵy ulyn kúdikti dep tapty. Polıtsııa bul qylmysty Drezden ortalyǵyndaǵy adamdardy tutqynǵa alý oqıǵasymen baılanysty dep otyr.
