«Drevnıı Rım» meıramhanasyndaǵy jas jigittiń ólimi: Sot úkim shyǵardy
QARAǴANDY. QazAqparat – Búgin Qaraǵandy oblysynyń qylmystyq ister jónindegi mamandandyrylǵan aýdanaralyq soty «Drevnıı Rım» meıramhanasynyń janyndaǵy jappaı tóbeleste adam óltirý faktisi boıynsha aıyptalýshylarǵa sot úkimin shyǵardy, dep habarlaıdy QazAqparat tilshisi.
Úkim AK-159/1 mekemesinde jarııalandy. Bul mekemede barlyq sot otyrystary ótti. Atalǵan iske qatysy bar 13 aıyptalýshyǵa qatysty úkimdi sýdıa Shárip Seısembaev oqydy.
Negizgi aıyptalýshy ıÝsıf Nýrýlý 19 jylǵa bas bostandyǵynan aıyryldy. Úkimdi oqylǵan kezde onyń anasy esinen tanyp, oǵan medıtsınalyq kómek kórsetildi. Bas bostandyǵynan aıyrýdan bólek, sot jábirlenýshi tarapynan berilgen azamattyq talapty da ishinara qanaǵattandyrdy. Nátıjesinde ıÝsıf Nýrýlý qaza tapqan jigittiń otbasyna 3 mln teńge tóleýi tıis.
Qaza tapqan jigittiń ákesi Baqytjan Janseıit jábirlenýshi retinde 30 mln teńge kóleminde moraldyq jáne materıaldyq zııandy óteý týraly talap aryz bergen.
Shyǵarylǵan sot aktisine sáıkes Torgom Malhasıan, Hachatýr Ogannısıan, Jasýr Pırov, Kaır Nadyrbekov, Davıd Galkın jáne Nýrýlý Vasıf 4-ten 4,5 jylǵa bas bostandyǵyn shekteý jazasy kesildi. Taǵy tórt aıyptalýshy - Tıgran Stepanıan, Armen Ogannısıan, Bolat Jumamuratov, Ilıa Şýrok úsh jylǵa bas bostandyǵynan aıyryldy. Al eki sottalýshy – Sohak Malhasıan men Armen Hachatrıan jábirlenýshimen tatýlasýyna baılanysty qylmystyq jaýaptylyqtan bosatyldy.
Іs materıaldaryna sáıkes, 31 jeltoqsannan 1 qańtarǵa qaraǵan túni «Drevnıı Rım» meıramhanasynda tóbeles bolǵan. Іshimdikke masaıǵan meıramhana qonaqtary mekeme qojaıyndarynan mýzykany jalǵastyrýdy talap etken. Sosyn eki jaq arasynda kelispeýshilik shyǵyp, qonaqtar ózderi az bolǵandyqtan, telefon arqyly dastaryn shaqyrǵan. Kelgenderdiń arasynda Rahymjan Janseıit te bar edi. Tóbeles kezinde sanynan jáne ishinen jaraqat alǵan jigit oqıǵa ornynda qaıtys boldy. Saraptamaǵa sáıkes, 23 jastaǵy jigit asa kóp mólsherde qan joǵaltý saldarynan qaıtys bolǵan.
Eske sala keteıik «Drevnıı Rım» meıramhanasynyń janyndaǵy tóbelesten jas jigittiń qaza bolýyna baılanysty qoǵamda úlken daý týdy. Qaraǵandyda birneshe kún boıy kinálilerdi izdeý jáne jazalaý talaptary boıynsha narazylyq aktsııalary ótti. Áleýmettik jelilerde ultaralyq qaqtyǵys týraly habarlamalar men jazbalar tarady. Keıinirek osyndaı aqparatty taratýshylarǵa qatysty jeke qylmystyq is qozǵaldy.
