Doıbydan respýblıkalyq týrnır ótti
QYZYLORDA. QazAqparat-Qyzylorda qalasynda doıbydan tuńǵysh sport sheberi Baq Imanalıevti eske alýǵa arnalǵan kóz múgedekteri arasynda respýblıkalyq týrnır ótti, dep habarlady QazAqparat tilshisi.
Bıyl jetinshi márte uıymdastarylǵan jarysqa Qyzylorda qalasy men aýdandardan jáne Túrkistannan doıbyshylar qatysty.
B.Imanalıev Aral aýdany, Qambash aýylynyń týmasy. 1984 jyly alǵash ret KSRO fınalyna qatysqan birinshi qazaq jigiti. Ol 30 jasynda «Býrevestnık» erikti sport qoǵamynyń odaqtyq birinshiliginde sport sheberiniń normasyn artyǵymen oryndap, doıbydan alǵashqy sport sheberi atandy. Qazaq soqyrlar qoǵamynyń ondaǵan jyldar boıǵy (1981-2008) jeńimpazy, sondaı-aq úsh ret Qazaqstannyń chempıony, Qazaqstan táýelsizdigine arnalǵan týrnırdiń, ózge de iri týrnırlerdiń bas júldegeri, birneshe ret KSRO komandalyq birinshilikteriniń chempıony jáne júldegeri boldy.
Tórt kúnge sozylǵan jarys nátıjesinde araldyq Dáýlet Dúısenbaev jeńimpaz atandy. Ekinshi oryndy qazalylyq Asqar Sársenbaı ıelense, úshinshi oryndy qyzylordalyq Ertaı Ábımolda enshiledi.
«Jeńiske degen jigeri úshin» nomınatsııasymen syrdarııalyq Rýslan Rahmanberdıev, «Ardager oıynshy» - qyzylordalyq Aleksandr Kım, «Eń jas oıynshy» - 17 jastaǵy jańaqorǵandyq Aısana Almabekova, belsendi qatysqany úshin qazalylyqtar Rabıǵa Shalamen, Ardaq Esirkepova jáne jańaqorǵandyq Madına Nurseıit marapattaldy.
