Doıbydan el chempıonaty: Qazaqstannyń úzdik komandasy anyqtaldy
ORAL. QazAqparat - Pavlodar qalasynda doıbydan márege jetken el chempıonatynda BQO quramasy úzdik nátıje kórsetti, dep habarlaıdy QazAqparat tilshisi.
BQO dene shynyqtyrý jáne sport basqarmasynan túsken málimetke qaraǵanda, erler, áıelder, 23 jasqa deıingi jastar jáne 20 jasqa deıingiler arasynda ótken birinshilikke elimizdiń toǵyz óńirinen 58 doıbyshy qatysty.
Oıynshylar doıbynyń klassıka, rapıd jáne blıts túrlerinen synǵa tústi.
Jarys qorytyndysynda alty doıbyshymen barǵan BQO quramasy segiz birdeı altyn medaldi jeńip aldy. Klassıkadan 20 jasqa deıingilerden Ádilhan Meıram men Toǵjan Tájibekova, 23 jasqa deıingilerden Elızaveta Bapıeva jeńis tuǵyryna kóterildi. Rapıdten 20 jasqa deıingilerden Nursat Tasteev pen Toǵjan Tájibekova chempıon atandy. Blıtsten 20 jasqa deıingilerden Aıshat Aqylbek pen Ádilhan Meıram úzdik shyqty. Ásirese, erlermen synǵa túsken 14 jasar Anel Dáýletovany erekshe atap ótýge bolady. Ol 23 jasqa deıingiler arasynda rapıdten eshkimdi shydatpasa, jalpy esepte ekinshi orynǵa ıe boldy.
Osylaısha BQO-dan barǵan alty doıbyshynyń bári de jeńimpaz atandy.
Jalpykomandalyq esepte BQO quramasy ozyq shyqsa, túrkistandyqtar ekinshi, astanalyqtar úshinshi, qaraǵandylyqtar tórtinshi orynǵa ıe boldy.
