Dota 2: Qazaqstandyq Rune Eaters shırek fınalda baq synaıdy
ASTANA. KAZINFORM — Astanada ótip jatqan «Bolashaq oıyndary — 2026» halyqaralyq týrnırinde Dota 2 dıstsıplınasy boıynsha pleı-off kezeńi qyza tústi. Komandalar júlde qory 1 mıllıon AQSh dollary úshin baq synap jatyr.
Búgin týrnırdiń shırek fınalyndaǵy tórt kezdesý ótedi. Qazaqstan namysyn jas kıbersportshylardan quralǵan Rune Eaters komandasy qorǵaıdy. Olar jartylaı fınal joldamasy úshin álemge tanymal LGD.Pinghu komandasymen kezdesedi.
Qazaqstandyq komanda pleı-offtyń alǵashqy kezeńinde Play Time quramasyn 2:0 esebimen senimdi jeńip, shırek fınalǵa shyqty. Endi Rune Eaters úshin týrnırdiń eń mańyzdy matchtarynyń biri ótpek.
Dota 2 jarysy «Bolashaq oıyndarynyń» eń tartysty dıstsıplınalarynyń biri sanalady. Týrnırge álemniń úzdik komandalary qatysyp, chempıondyq ataqpen qatar qomaqty júlde qoryn sarapqa salyp jatyr.
Jarystyń sheshýshi kezeńderi 3-5 tamyz aralyǵynda ótedi. Al Dota 2 boıynsha jeńimpaz komanda 5 tamyz kúni anyqtalady.
Týrnırge qatysyp jatqan sheteldik komandalar da jarystyń joǵary deńgeıde uıymdastyrylǵanyn atap ótti. Fılıppındik kıbersportshy, Mavis laqap atymen tanymal Bred Alvızonyń aıtýynsha, Astanadaǵy doda halyqaralyq deńgeıdegi iri jarystardan kem túspeıdi.
— Bul jarystyń ázirge alǵashqy kúni ǵana bolǵandyqtan, ony tolyq baǵalaý qıyn. Biraq daıyndyq, oıyn kestesi jáne uıymdastyrý deńgeıi halyqaralyq iri týrnırlerden kem emes. Barlyq qyzmetkerler bizdi óte jyly qarsy aldy, bári joǵary deńgeıde uıymdastyrylǵan. Al oıynǵa kelsek, alǵashqy kezeńderde basymdyq bizde boldy. Alaıda sheshýshi sátterde jyldam ári durys sheshim qabyldaý jaǵynan tájirıbemiz jetispedi. Bolashaq jarystarda osy baǵytty kúsheıtýge tyrysamyz, — dedi fılıppındik oıynshy Bred Alvızo.
