Dosjandy jeńis tuǵyrynan kóremin dep oılaımyn - Nurbaqyt Teńizbaev, grek-rım kúresinen Olımpıada júldegeri
ASTANA. QazAqparat - Grek-rım kúresinen Beıjiń olımpıadasynyń júldegeri Nurbaqyt Teńizbaev balýandar týraly taldaý jasap, Feısbýktegi jeke paraqshasynda jarııalady.
«Dostar!!! Rıo olımpıadasynyń aldynda kishigirim sholý jasap Feısbýkke salyp jatyrmyn, maqsatym Qazaqstan grek-rım kúresinen qurama komandasynyń balýandarymen jaqyn tanystyrý», - dep sózin bastaǵan Nurbaqyt Teńizbaev.
Ol jurtshylyq balýandardy qola nemese kúmis aldy dep jańalyqtan ǵana tanysqanymen, sol jetistikke sportshynyń qalaı jetkenin bile bermeıdi deıdi.
«Sondyqtan, Sizderge Rıo olımpıadasy aldynda, balýandarymyz týraly aqparat usynamyn», - deıdi áleýmettik jelisinde Teńizbaev. Ol osy jasbasynda 75 keli salmaq dárejesindegi balýandardyń álem reıtıngidegi orny týraly keńinen toqtalyp, kósh basynda kimderdiń turǵanyn aıtady.
«75 keli salmaq dárejesindegi kúres eń tartymdy, pýblıkaǵa unaıtyn salmaqtardyń biri. Reıtıng boıynsha 1- orynda Reseılik Roman Vlasov turaqtalǵan. 2- orynda bizdiń Dosjan Kartıkov, 3 -orynda Ońtústik Koreı eliniń balýany Kim Hyeon-woo. Reseılik Roman Vlasov kúresti 6 jasynan bastaǵan. Qazirde London olımpıadasynyń chempıony, 2 dúrkin álem chempıony, 2 dúrkin Evropa chempıony degen ataǵy bar balýan. Elimizdiń atynan Rıoda óner kórsetetin Dosjan Kartıkov 2015 jylǵy Las-Vegastaǵy álem chempıonatynyń qola júldegeri, Las-Vegastaǵy kilemde sensatsııa jasap, Ońtústik Koreıa elinen kelgen Olımpıada chempıonyn utqan jáne London olımpıadasynyń kúmis júldegeri, Álem chempıony Armenııalyq Arsen Djýlfalakıannyń jaýyrynyn jerge tıgizgenin sol jerde otyryp kórgen edik», - deıdi Nurbaqyt Teńizbaev.
Sondaı-aq, belgili balýan Dosjannyń jetistikterin de aıta ketken.
«Bul salmaqta árıne, chempıondyq bizdiń Dosjanǵa buıyrtsa eken deımiz, Dosjan álemdik reıtıngtiń basynda kórinýi jáı emes, óziniń eńbegimen, álem chempıonatynda araǵa 15-20 mınýt salyp kúresip júrdi, onyń ózinde jaqsy nátıje kórsetip keldi. Árbir beldesýdiń arasynda 15-20 mınýt qana demalý degendi óz tájirıbemnen bilemin kelesi beldesýge jınalý ońaı emes. Alaıda, bizdiń Dosjanda tez jınalyp alý sııaqty jaqsy qasıetteri bar. Buıyrsa, Dosjandy jeńis tuǵyrynan kóremin dep oılaımyn!», - deıdi Teńizbaev óz paraqshasynda.
