Dosyn soqqyǵa jyǵyp, óltirmek nıetpen otqa oranǵan úıge tastap ketken kúdikti ustaldy - ІІM
ASTANA. 14 tamyz. QazAqparat - Kókshetaý qalasynda 39 jastaǵy er adam ustaldy. Ol óziniń dosyn soqqyǵa jyǵyp, baılap-matap, óltirý nıetimen otqa oranǵan úıge tastap ketken. Bul týraly búgin aptalyq brıfıng barysynda QR Іshki ister mınıstrliginiń resmı ókili Nurdildá Oraz málim etti.
Resmı ókildiń sózine qaraǵanda, ústi-basyn kúıik shalǵan qala turǵyny Aqmola oblystyq aýrýhanasynyń qabyldaý bólimine jetkizilgenimen, arada birneshe kún ótkende kóz jumdy. Anyqtalǵandaı, sol kúni jábirlenýshi men onyń tanysy saıajaıda bolyp, spırttik ishimdik ishken. Sonyń saldarynan er adamdardyń arasynda tóbeles týyndap, nátıjesinde biri ekinshisine dene jaraqatyn salǵan. Sodan soń ony baılap-matap tastap, saıajaıǵa órt qoıǵan.
«Degenmen, jábirlenýshi úıdiń terezesi arqyly syrtqa shyqqan. Oqıǵa ornyna órt sóndirýshiler shaqyrylyp, jábirlenýshi aýrýhanaǵa jetkizilgen. Ustalǵan azamat qamaýǵa alynyp, QR QK-niń 96-baby 2-tarmaǵy boıynsha qylmystyq is qozǵaldy», - dedi N. Oraz.
