Dosym Sátpaev onkologııalyq syrqattar úshin qan tapsyrdy
ALMATY. QazAqparat - Belgili saıasattanýshy, ǵalym Dosym Satpaev respýblıkalyq «Seniń kúniń donor!» aktsııasynyń 10-jyldyǵy aıasynda ótkizilgen sharada qan tapsyrdy, dep habarlaıdy QazAqparat tilshisi.
«Qazaqstanda mundaı qaıyrymdylyq jobalary uzaqqa sozylmaıdy. Sizder jańa azamattyq sana qalyptasýyna yqpal etip otyrsyzdar. Sebebi, qaıtarymsyz, rııasyz jaqsylyq jasaý degen túsinik qazir brendke aınalyp otyr. Men bul aktsııaǵa bıyl birinshi ret qatysyp otyrǵanym joq. Álemniń 62 eli qan tapsyrý jaǵynan alda keledi eken. Qazaqstan osy sapqa enýi kerek dep oılaımyn. Donorlyq qıyn sharýa emes, ýaqyt taýyp Qan ortalyǵyna kelseńiz bolǵany, bul jerde jumys sapaly, jolǵa qoıylǵan», - deıdi Dosym Satpaev.
Atalǵan aktsııany «Baýyrjan» qaıyrymdylyq qory, Respýblıkalyq qan ortalyǵy, qazaqstandyq Qyzyl aı qoǵamymen birlese otyryp uıymdastyrǵan.
Respýblıkalyq qan ortalyǵy dırektorynyń orynbasary Saıda Aryspaevanyń aıtýynsha, 10 jyl ishinde «Seniń kúniń, donor!» aktsııasynyń arqasynda myńdaǵan adamnyń ómirin saqtap qalýǵa múmkindik bolǵan.
«Jyl saıyn álemde 500 myń bala qan aýrýyna ushyraıdy, onyń 100 myńy donorlardyń jetispeýshiliginen kóz jumady. Sonymen qatar, jylyna álem boıynsha 92 mıllıona qan tapsyrylsa, 62 elde erikti donorlardyń arqasynda 100% qosymsha qan qory jınalady. Bıylǵy jyly «Seniń kúniń, donor!» aktsııasy «Ómir syıla - donor bol!» uranymen ótkizilip otyr», - dedi S.Aryspaeva.
Aktsııa 2017 jyldyń 15 mamyry men 14 maýsymy aralyǵynda ótedi. Qan onkologııalyq aýrýmen syrqattanǵan jandarǵa berilmek.
Eske sala keteıik, «Seniń kúniń donor!» aktsııasy Qazaqstanda alǵash ret 2008 jyldyń mamyr aıynda Búkilálemdik donor kúnine oraı ótkizilgen. Bıyl aktsııa 10 jyldyǵyn atap ótip otyr. Sońǵy jyldary erikti donorlar qatary elimiz boıynsha 65%-ǵa ósken. Respýblıkalyq qan ortalyǵynyń málimeti boıynsha, donorlar sany 2008 jyly 181 795-ten 2016 jylǵy sanaqpen eseptegende 221 910 adamǵa artqan.
