«Dostyq kerýeni» Ózbekstannan elge oraldy
Quramyna zııaly qaýym ókilderi, eńbek ardagerleri, etno-mádenı birlestikterdiń tóraǵalary men BAQ ókilderi engen kerýendi Ózbekstandaǵy Qazaq ulttyq mádenı ortalyǵynyń basshylyǵy kútip alyp, kórshiles eldiń tarıhı-mádenı oryndarymen tanystyrǵan.
Baýyrlas elder arasynda dostyq qarym-qatynasty nyǵaıtý maqsatynda uıymdastyrylǵan sapar aıasynda, qazaqstandyqtar aldymen Tashkenttegi Tólebı baba kesenesine zııarat etti. Samarqandaǵy áıgili Regıstan tarıhı-sáýlettik keshenimen tanysyp, Shahı-Zında tarıhı kesheninde jerlengen Ózbekstannyń eks-prezıdenti Islam Karımovtyń rýhyna Quran aıattaryn baǵyshtady. Sondaı-aq Buharadaǵy Bahaýaddın Nakshbandı mavzoleıin aralap kórdi.
«Bul issapar Ózbekstan Respýblıkasynyń Prezıdenti Shavkat Mırzıeevtiń naýryz aıynda Qazaqstanǵa jasaǵan resmı sapary kezinde Qazaqstan halqy Assambleıasy men Ózbekstan ınternatsıonaldy mádenı ortalyǵynyń arasynda túzilgen yntymaqtastyq týraly memorandým aıasynda uıymdastyrylyp otyr. Memorandým eki el arasyndaǵy mádenı yqpaldastyqty arttyryp, Qazaqstan halqy Assambleıasy men Ózbekstan ınternatsıonaldy mádenı ortalyǵynyń áriptestigin nyǵaıtýdy kózdeıdi. Sonyń aıasynda etnosaralyq birlikti qamtamasyz etip otyrǵan uıymdardyń qos elge etnosaıahat uıymdastyrýyna múmkindik berip otyr», - deıdi Erbol Baıqonaqov.
«Dostyq kerýeni» OQO Qazaqstan halqy Assambleıasynyń uıymdastyrýymen Ózbekstanǵa ekinshi ret jol tartyp otyr. Dostyq nıettegi ózbekstandyq delegattar da Ońtústik Qazaqstan oblysynyń tarıhı oryndaryna saıahattar uıymdastyrýda. Resmı málimetterge sáıkes, búginde Ózbekstanda 800 myńnan astam qandasymyz turady. Al Qazaqstandaǵy ózbek etnosy ókilderiniń sany 550 myńǵa jýyqtaıdy. Aldaǵy ýaqytta «Dostyq kerýeni» jobasy eki el arasynda mádenı yqpaldastyqty odan ári nyǵaıtaryna senim mol.
