"Dostyq-Alashankoý" shekara ótkelinen Qytaıdan Eýropaǵa bet alǵan 3 myń júk poıyzy ótti

BEIJІŃ. QazAqparat – 2021 jyldyń birinshi jarty jyldyǵynda Qazaqstan men Qytaıdyń shekarasynda ornalasqan «Dostyq (QR) – Alashankoý (KHR)» shekara ótkeli arqyly ótken «Qytaı-Eýropa» halyqaralyq temirjol júk tasymaldaý marshrýttarynyń aıasynda júk poıyzdarynyń sany edáýir ósti, dep habarlaıdy QazAqparattyń menshikti tilshisi Qytaı kedeniniń derekterine silteme jasap.

Jergilikti kedenniń deregine saı, kórsetilgen ýaqyt aralyǵynda «Alashankoý», Qytaıdyń soltústik-batysyndaǵy Shyńjań-Uıǵyr avtonomııalyq aýdanyndaǵy qurlyqtaǵy iri shekara ótkeli arqyly barlyǵy «Qytaı-Eýropa» marshrýttary boıynsha júrgen 3 033 júk poıyzy ótken. Bul ótken jyldyń osy kezeńimen salystyrǵanda, 41,07%-ǵa kóp. Tasymaldanǵan taýarlardyń kólemi 56,08%-ǵa ósip, 2,28 mln tonnaǵa jetken.

Qytaı kedeni ókilderiniń aıtýynsha, «Alashankoý» transshekaralyq ótkizý pýnkti arqyly «Qytaı-Eýropa» marshrýty boıynsha júk poıyzdarynyń qozǵalysy táýlik boıy júzege asady, eki baǵytta da júk tasymalynyń turaqty ósýi baıqalady.

«Alashankoý» shekara ókeli arqyly Qytaıdy Germanııa, Polsha, Belgııa jáne basqalaryn qosqanda, 13 elmen baılanystyratyn 22 marshrýt júredi. Tasymaldanatyn júkterdiń taýarlyq nomenklatýrasy 200-den asa taýar attaryn qosady.

Eske sala keteıik, 2013 jylǵa deıin Dostyq (QR) jáne Alashankoý (QHR) stantsııalary arqyly ótetin shekara ótkeli 1991 jyly qoldanýǵa berilgen sátten bastap Qazaqstan men Qytaıdy baılanystyratyn jalǵyz temirjol qatynasy boldy.

2012 jyldyń jeltoqsanynda «Altynkól» (QR) – «Horgos» (QHR) temirjol ótkeli qoldanysqa berildi.