«Dostyq-Moıynty» ýchaskesinde eksporttyq jáne tranzıttik tasymaldardy ulǵaıtý qajet – Premer-mınıstr
ASTANA. KAZINFORM — «Dostyq-Moıynty» ýchaskesinde eksporttyq jáne tranzıttik tasymaldardy ulǵaıtý máselesine basa mán berý qajet. Bul týraly búgin Úkimet otyrysynda Premer-mınıstr Oljas Bektenov aıtty.
- Bıyl aýyl sharýashylyǵy salasy aıtarlyqtaı ósim qarqynyn kórsetti. Bul egis alqaptaryn ártaraptandyrý men agrotehnologııalardy tıimdi qoldaný nátıjesinde múmkin boldy. Jınalǵan ónimdi saqtap, ótkizý úshin ákimdikter men Aýyl sharýashylyǵy, Saýda jáne Kólik mınıstrlikteri úılesimdi jumys isteýge tıis. Sondaı-aq Qarjy jáne Ulttyq ekonomıka mınıstrlikterimen birlesip, kelesi jyly agroónerkásip keshenin ýaqtyly qarjylandyrý jumystaryn júrgizý qajet, - dedi Oljas Bektenov.
Premer-mınıstr Qazaqstannyń tranzıttik múmkindikterin odan ári arttyrý úshin aıtarlyqtaı áleýet bar ekenin atap ótti.
- Kólik mınıstrligi salalyq ulttyq kompanııalarmen birge negizgi ınfraqurylymdyq jobalardyń ýaqtyly jáne sapaly iske asyrylýyn qamtamasyz etýi qajet. Bul elimizdiń kólik júıesin damytýda strategııalyq mańyzǵa ıe. Atap aıtqanda, avtojol jelilerinde jáne «Almaty aınalma temirjol» jobasynda qurylys jumystaryn ýaqtyly aıaqtaý kerek. Sondaı-aq «Dostyq-Moıynty» ýchaskesinde eksporttyq jáne tranzıttik tasymaldardy ulǵaıtý máselesine basa mán berý kerek. Buǵan qosa, sheteldik ruqsat blankilerin elektrondyq formatqa kóshirý boıynsha jumystardy jalǵastyrý qajet. Bul sharalar tasymaldaý kólemin ulǵaıtýǵa jáne kólik jelisiniń sapasyn arttyrýǵa múmkindik beredi, - dedi ol.
Aıta keteıik, Úkimet otyrysynda 2025 jylǵy qańtar-qyrkúıek aılaryndaǵy áleýmettik-ekonomıkalyq damý qorytyndylary men respýblıkalyq bıýdjettiń atqarylý barysy talqyǵa salyndy.