«Dostyq – Moıynty» ekinshi temirjol jelisi jospardan eki jyl buryn aıaqtaldy — Rýslan Jeldibaı
ASTANA. KAZINFORM – Qazaqstan Respýblıkasy Prezıdentiniń kómekshisi — Prezıdenttiń baspasóz hatshysy Rýslan Jeldibaı «Dostyq – Moıynty» temirjol magıstrali Qazaqstannyń Qytaı men Eýropa arasynda temirjolmen júk tasymaldaýdaǵy jetekshi rólin kúsheıtetinin aıtty.
— Búgin Memleket basshysy «Dostyq — Moıynty» temirjol magıstraliniń ekinshisi jelisin iske qosty. Prezıdent Qasym-Jomart Toqaev saltanatty is-sharada sóılegen sózinde atalǵan baǵyt boıynsha kólik qatynasynyń bastalýyn tarıhı oqıǵa dep baǵalady.
Shyn máninde, strategııalyq jobanyń sátti júzege asýy el ekonomıkasyna zor serpin beredi. Qazaqstan Eýrazııadaǵy mańyzdy kólik-tranzıt haby retindegi pozıtsııasyn nyǵaıta túsedi, — dedi ol.
Jańa jol Qazaqstannyń Qytaı men Eýropa arasynda temirjolmen júk tasymaldaýdaǵy jetekshi rólin kúsheıtedi.
— Eksporttyq taýar jetkizý merzimi aıtarlyqtaı qysqarady. «Dostyq — Alashańqaı» shekara ótkeli arqyly júk tasymalynyń kólemi bes ese ósedi. Atalǵan baǵyt bir táýlikte ótkize alatyn poıyzdar sany 12-den 60 jupqa deıin ulǵaıady. Konteınermen júk tasymalynyń jyldamdyǵy táýligine 1500 shaqyrymǵa deıin artady.
Joba TransQazaqstan temirjol dálizin qalyptastyrýdyń bastapqy bóligi retinde elimizdiń tranzıttik áleýetin eleýli túrde nyǵaıtady.
Aıta ketý kerek, joba el ekonomıkasyna qosymsha mýltıplıkatıvti turǵydan áser etedi. Qurylys barysynda otandyq zaýyttardan 113 myń tonnadan astam rels pen 1,6 mıllıon temir-beton shpal satyp alyndy. Qyzmetter men taýarlardyń qazaqstandyq úlesi 85 paıyzǵa jetti. Aýqymdy jobaǵa 1500-den asa arnaýly qurylys tehnıkasy, 3 myń jumysshy jumyldyrylyp, shaǵyn jáne orta bıznestiń 7 myń ókili atsalysty, — dedi Rýslan jeldibaı.
Saýatty josparlaý men qurylysshylardyń tabandy eńbeginiń arqasynda temirjol jelisi belgilengen merziminen eki jyl buryn aıaqtaldy.
— Memleket basshysynyń tranzıttik áleýetimizdi keńeıtý jónindegi tapsyrmasyn júzege asyrý jalǵasady. Búginde birneshe magıstraldiń qurylysy men jańǵyrtý jumystary júrgizilip jatyr. Atap aıtqanda, Baqty — Aıagóz, Moıynty — Qyzyljar, Altynkól — Jetigen jobalary júzege asyrylýda. Sondaı-aq el aýmaǵynda úsh myń shaqyrymǵa jýyq temirjol jóndelip jatyr, — dedi ol.
Aıta ketelik Memleket basshysy «Dostyq — Moıynty» temirjolynyń ekinshi jelisin iske qosqan edi.