Dostastyq kýbogynyń aqtyq fınalynda "Aqtóbe" qatarynan ekinshi ret kúmis júldeger atandy

dep habarlaıdy QazAqparat.

Vladımır Muhanov jattyqtyratyn aqtóbelik aıaqdopshylar bul joly Qazan qalasynyń "Rýbın" komandasyna (2:5) ese jiberdi. Oǵan deıin olar jartylaı fınalda Lıtvanyń "Ekranes" (3:0), shırek fınalda Belorýstyń "Dnepr" (3:1), al toptyq kezdesýde Ázirbaıjannyń "Baky" (2:0), Tájikstannyń "Vahsh" (2:0) komandalaryn utyp, tek Fınlıandııanyń "HIK" komandasyna 0:1 esebimen utylǵan edi.

Bıyl 18-shi ret uıymdastyrylǵan bul týrnırde Vladımır Muhanovtyń shákirtteri ótken jylǵy jetistigin qaıtalady. Olar byltyr toptyq kezeńde Reseıdiń «Rýbın». Ózbekstannyń "Pahtakor" jáne Armenııanyń "Ararat" fýtbolshylarymen kezdesip "A" tobynda úzdik shyqty. Odan keıin shırek fınalda Belarýstyń «MTZ-RIPO» (4:1), jartylaı fınalda Ázirbaıjannyń «Inter» (1:0) komandasyn utyp, aqtyq synda Moldovanyń "Sherıf" komandasyna 4:5 esebimen utyldy. Bul oıynda negizgi jáne qosymsha ýaqytta komandaldar teń túskendikten jeńimpazdy penaltı arqyly anyqtaý kezinde moldovalyqtar 5:4 esebimen basym túsken. Osylaısha el tarıhynda alǵash ret Dostastyq kýbogynyń kúmis júldegeri atanǵan aqtóbelikter, buǵan deıin 2006, 2007, 2008 jyldary toptyq kezeńde úshinshi oryndy qanaǵat tutyp kelgen edi.

Jalpy qazaqstandyq aıaqdopshylardyń bul týrnırde oǵan deıingi eń joǵary kórsetkishi shırek fınaldyq oıyndar bolatyn. Oǵan 2005 jyly Almatynyń "Qaırat", 1996 jyly Semeıdiń "Elim-aı" klýbtary qol jetkizdi. Al ózge ýaqytta toptyq kezdesýden óte almady. Atap aıtqanda "Qaırat" 1993 jyly, "Ańsat" (Pavlodar) 1994 jyly, "Taraz" (Taraz) 1997 jyly, "Ertis" (Pavlodar) 1998, 2000, 2003, 2004 jyldary, "Elim-aı" (Semeı) 1999 jyly óz tobynda úshinshi oryndy alsa, 1995 jyl "Elimaı-aı", 2001-2002 jyldary "Jeńis" (Astana) sońǵy oryndy qanaǵat tutqan bolatyn.