Dostastyq kýbogy: «Aqtóbeniń» qarsylastary Ázirbaıjan, Fınlıandııa jáne Tájikstan chempıondary
ASTANA. Jeltoqsannyń 28-i. QazAqparat /Ernur Aqanbaı/ - Fýtboldan 2010 jylǵy TMD jáne Baltyq elderi chempıondary kýbogynyń jerebesi tartyldy. Bul týrnırde Qazaqstan namysyn el chempıony - Aqtóbeniń «Aqtóbe» klýby qorǵaıtyn bolady.
Jerebe boıynsha bizdiń komanda Ázirbaıjannyń «Baky», Fınlıandııanyń «HIK» jáne Tájikstannyń «Vahshem» klýbtarymen birge «V» tobynda oınaıtyn bolady.
«Aqtóbe» birinshi oıynyn 2010 jylǵy qańtardyń 16-synda «HIK-pen», qańtardyń 17-sinde «Vahshpen», al qańtardyń 19-ynda «Vakymen» ótkizedi. Atap óterligi, «Aqtóbe» 2009 jylǵy TMD jáne Baltyq elderi chempıondary kýbogy týrnıriniń kúmis júldegeri atanǵan bolatyn. Fınalda jerlesterimiz Moldovanyń «Sherıf» klýbyna ese jiberdi. «Aqtóbe» men «Sherıf» arasyndaǵy fınaldyq matchtyń negizgi jáne qosymsha ýaqyty 1:1 esebimen teń aıaqtalǵandyqtan, jeńimpaz penaltı tebýden anyqtalǵan bolatyn. Onda salqynqandylyq tanytqan moldovalyqtar 5:4 esebimen jeńiske jetti. Sóıtip «Aqtóbe» óz tarıhynda tuńǵysh ret Dostastyq kýbogynyń kúmis júldesine ıe boldy. Bul buǵan deıin atalmysh týrnırge qatysqan qazaqstandyq klýbtardyń ishindegi eń joǵary nátıje.
Al 2010 jylǵy Dostastyq kýbogy úshin jarysta «A» tobynda Belarýstyń «Dnepr», Qyrǵyzstannyń «Dordoı-Dınamo», Latvııanyń «Metallýrg», Reseıdiń «Rýbın»; «S» tobynda Ýkraınanyń «Dınamo» Kıev», Túrikmenstannyń «MTTÝ», Estonııanyń «Levadııa», Reseıdiń Klýbtar quramasy; «D» tobynda Ózbekstannyń «Býnedkor», Lıtvanyń «Ekranas», Molodovanyń «Dachııa», Armenııanyń «Pıýnık» komandalary óner kórsetetin bolady. Aıta keteıik «Dostastyq» kýbogy úshin jarys 2010 jylǵy qańtardyń 16-sy men 24-i aralyǵynda Máskeýde ótedi.
