Dostaryn sýdan qutqarǵan atyraýlyq oqýshy «Jas batyr» atandy

ATYRAÝ. QazAqparat – Dostaryn sýdan qutqarǵan atyraýlyq oqýshy Dinmuhammed Jańbyrbaı «Jas batyr» atandy. Oǵan bul atalym Balalar jyly aıasynda ótken jas patrıottar forýmynda tapsyryldy, dep habarlaıdy QazAqparat tilshisi.

Forýmǵa elimizdiń barlyq óńirinen 7-14 jas aralyǵyndaǵy balaýsa aqyndar, jazýshylar, blogerler, sýretshiler, ónerpazdar men sportshylar qatysqan.

Olardyń arasynan 10 atalym boıynsha 30 jeńimpaz anyqtalǵan.

Sonyń biri – Dinmuhammed Jańbyrbaı úsh balaly otbasynyń ortanshy perzenti. Qazir ol Atyraý qalasyndaǵy №3 orta mekteptiń 3-synybynda oqıdy.

Ol 3 jeltoqsanda Jaıyq ózeniniń muzy oıylyp, eki balanyń sýǵa batqan. Ony baıqaǵan 8 jasar Jańbyrbaı Dinmuhammed kómekke umtylǵan. Eki jasóspirimniń birin qolynan tartyp, sýdan shyǵýyna kómektesken. Sýdan shyqqan jasóspirimniń biri ekinshisin qutqaryp qalǵan. Keıin sýǵa batqan eki jasóspirimniń biri 14, ekinshisi 9 jasta ekeni anyqtalǵan.

«Ákem sol kúni ózenge barmaý keregin eskertti. Sol sebepten, balalardyń artynan ileskenimmen, muz ústine shyqpadym. Biraq, dostarymnyń muzǵa túsip ketkenin kórip, kómektesýge bardym. Qolymdy sozyp, bireýiniń sýdan shyǵýyna kómektestim. Keıin 6 polıtseı keldi. Ákem ózenge barǵanym úshin ursatyn bolar dep oılap edim. Alaıda, ákem urysqan joq. Synyptastarym «Dinmuhammed, jaraısyń!» dep qoldaý bildirdi», -deıdi Dinmuhammed Jańbyrbaı.

Eske sala ketelik, budan buryn Atyraýda 8 jasar bala Jaıyq ózenine batqan jasóspirimderdi qutqarýǵa kómekteskenin jazǵan edik.

Keıin sýǵa batyp bara jatqan dosyn qutqarǵan 8 jasar bala marapattaldy.

Al, Tótenshe jaǵdaılar mınıstr ıÝrıı Ilın 8 jasar Dinmuhammedtiń óńirine medal taqqan bolatyn.