Dossor munaıshylary sheteldik 350 júk kóliginiń júrgizýshilerine ystyq tamaq ákeldi
ATYRAÝ. KAZINFORM – Atyraý oblysynyń Jylyoı aýdanyndaǵy sý tasqynynan keıin sheteldik 350-ge jýyq júk kóligi jolǵa shyǵa almaı tur.
Olardyń arasynda Túrikmenstan men Ózbekstannyń, Ýkraına men Moldavanyń, Rýmynııanyń, elimizdiń ózge óńirderinde turatyn júrgizýshiler bar. Avstrııa eliniń eki júrgizýshisiniń turǵanyna biraz bolǵan.
Júk kólikteri Ózbekstanǵa, Aqtaý qalasyna baǵyt alǵan. Máselen, túrikmenstandyq Mehban Amangeldıev Reseıden kele jatyr. Ol munda 5 sáýirden beri tur. Al, Ózbekstan Respýblıkasynyń azamaty Shohır Rabbıev Túrkııadan jolǵa shyqqan.
«Biz Ózbekstanǵa Qulsary arqyly shyǵýymyz kerek edi. Biraq, Dossormen eki ortadaǵy joldy sý shaıǵan soń júrýge ruqsat berilmedi» -deıdi Shohır Rabbıev.
«Dossormunaıgaz» basqarmasynyń ujymy óz erkimen qarjy jınap, jolda qalǵan júrgizýshiler men kómekshilerine ystyq tamaq, ózge qajetti azyq-túlik ákelip berdi.
«Atyraý munaıshylary áleýmettik kómekke muqtaj jandar úshin udaıy qaıyrymdylyq sharalaryn turaqty uıymdastyryp keledi. Óńirde sý tasqynyna baılanysty qıyndyq týyndap tur. Alys jolǵa shyǵyp, úıinen jyraqtaǵan júk kólikteriniń júrgizýshilerin ystyq tamaqpen, azyq-túlikpen qamtýdy kózdedik. Qazir Dossor kentiniń mańynda turǵan júk kólikterinde 450 adam bar», -deıdi basqarma basshysynyń orynbasary Qýandyq Qalıdýllın.
Eske sala ketelik, buǵan deıin Atyraýda dabyl sırenasy qosylady degen jalǵan aqparat taraǵanyn habarlaǵan bolatynbyz.
