Dosqalıev Aqtóbeden aǵzalardy tasymaldaıtyn sanavıatsııa qyzmetin ashýdy usyndy
Aqtóbede uıymdastyrylǵan «Týǵan jer» respýblıkalyq forýmyna qatysqan akademık Jaqsylyq Dosqalıev eki adamǵa baýyr aýystyrý otasyn jasady. Onyń biri máıittik donordan jasalsa, 12 jastaǵy qyzǵa týysynyń baýyry salyndy.
Kúrdeli otanyń basy-qasynda júrgen Ulttyq transplantologııa ortalyǵynyń dırektory Jaqsylyq Dosqalıev osy saladaǵy qıyndyqtardyń túıinin sheshýdi surady. «Eýropa elderinde máıittik donor baǵyty jaqsy damyǵan. Al Azııa elderinde kóbine aǵzalar jaqyndarynan alynady. Tasymaldaý qyzmeti, sanıtarlyq avıatsııa týraly usynysym bar. Mınıstrlik qoldaý bildiredi degen úmittemin. Aqtóbe qalasynan aǵzalardy tasymaldaıtyn sanıtarlyq avıatsııa qyzmetin ashý qajet dep esepteımin. Sebebi, aımaqta medıtsınalyq klaster qolǵa alyndy, transplantolog-hırýrgter bar. Qazaqstannyń batys óńiriniń ortalyǵy sanalatyn Aqtóbede ushaq, tikushaqpen ushyp baryp, jol jóndelgen soń kólikpen aǵzalardy tasymaldaýǵa múmkindik jasalǵany durys. Máselen, máıittik donor bolǵan adamnyń baýyryn Petropavldan tasymaldaý úshin birneshe kún buryn Astanaǵa habrlastyq. Olar soltústik óńirge baryp donordyń baýyry men júregin, ókpesin, búıregin, kózin aldy. Keıin osy aǵzalardy jan-jaqqa taratty. Aqtóbede em alyp júrgen Atyraý oblysynyń turǵynyna baýyr tini sáıkes bolyp shyqty. Bul medıtsınalyq klasterdiń jumys istep turǵanyn kórsetedi. Sanavıatsııa ashylsa mamandar baryp, ózderi aǵzany tikeleı jetkizer edi. Bul qarjy únemdeýge, ýaqyt qysqartýǵa baǵyttalǵan jumys»,- dedi akademık Jaqsylyq Dosqalıev.
Statıstıkaǵa súıensek, 2014 jyldan beri Aqtóbede 36 búırek, 10 baýyr aýystyrý otasy jasaldy. Úsh jyldyq jumystyń qorytyndysyn Jaqsylyq Dosqalıev joǵary baǵalady.
«Sanavıatsııa týraly eki jyldan beri kelisim júrip jatyr. Bizge ushaq, tikushaq qajet. Mınıstrlik bul usynysty qoldasa, óńir qural-jabdyqtarmen, ǵımaratpen jáne mamandarmen qamtamasyz ete alady. Bul óte jaqsy usynys»,- dedi Aqtóbe oblysynyń ákimi Berdibek Saparbaev.
Akademık Jaqsylyq Dosqalıev Aqtóbedegi medıtsınalyq klaster jumysyn joǵary baǵalady. «Bir-birine janaspaıtyn baǵyttardy biriktirip, bir bútin etý óte qıyn jumys. Elimizde alǵash ret respýblıkalyq, jergilikti bıýdjet pen jekemenshik biriktirildi. Osy jolmen ınvestıtsııa tartyldy. Elbasy Nursultan Nazarbaev «Qazaqstan joly - 2050: Bir maqsat, bir múdde, bir bolashaq» Joldaýynda «Qazaqstannyń alǵashqy zamanaýı ýrbanıstik ortalyqtary iri qalalar - Astana men Almaty, odan soń - Shymkent pen Aqtóbe bolady. Olar halyqtyń jáne ınvestıtsııalardyń shoǵyrlaný ortalyqtaryna aınalady, sapaly bilim berý, medıtsına, áleýmettik-mádenı qyzmetter kórsetedi» dep atap ótti. Aqtóbede bul tapsyrma iske asyrylyp jatyr. Aqtóbede medıtsınalyq klaster qurylyp, alǵashqy nátıjesin bere bastady. Elimiz úshin úlgi bolarlyq is»,- dedi J. Dosqalıev.
