Doshan Joljaqsynovtyń qatysýymen túsirilgen tańdaýly fılmderdiń toptamasy DVD dıskide jaryq kórdi

Jýrnalısterge jınaqtyń tusaýkeser rásimin búgin Astanada D.Joljaqsynovtyń áriptesteri men dostary QR Parlamentiniń depýtaty, kompozıtor Tólegen Muhamedjanov, Qazaqstannyń halyq ártisi, rejısser Talǵat Temenov jáne osy jobany júzege asyrýshy «Meloman» kompanııasynyń dırektory Vladımır Remnev ótkizdi.

Jınaq akter jáne rejısser D.Joljaqsynovtyń týǵanyna 60 jyl, shyǵarmashylyq jolyna 30 jyl tolǵan mereıtoılyq datalarǵa arnaldy. Oǵan «Birjan sal» (2009 j.), «Ompa» (1998 j.), «Kóshpendiler» (2005 j.), «Aı astyndaǵy úı» (1983 j.), «Qutyrǵan ıtterdi qamalaý» (1990 j.), «Teńiz jaǵalaı júrgen tarǵyl tóbet» (1990 j.), «Jábirlenýshiler shaǵym shaqpaıdy» (1986 j.), «Altyn kúz» (1980 j.), «Qojajas» (1984 j.), «Gaýhartas» (1975 j.) syndy 10 úzdik kórkem kınolenta endi.

«Doshan teatr sahnasyna jastaıynan kóterildi. Qurmanǵazy atyndaǵy konservatorııanyń stýdenti bola júrip, jasóspirimder teatrynda oınady. Sol teatrda óziniń alǵashqy shyǵarmashylyq jolyn bastady. Keıin «Gaýhartas» fılmine alǵash ret kınoǵa tústi. Odan keıin óte tanymal, «Daladaǵy qýǵyn» nemese «Bandyny qýǵan Hamıtte» Hamıttiń rólin oınap, jastardyń arasynda tanymal, keremet súıikti akterǵa aınaldy. Ómirlik jolynda 40-tan astam kınoǵa tústi. Olardyń arasynda tek «Qazaqfılmniń» ǵana emes, «Mosfılmniń», A.P.Dovjenkonyń kınolary bar. Al kıno salasynda eń sońǵy shyqqan shyńy ol - «Birjan sal»», - dep atap ótti T.Muhamedjanov.

T.Muhamedjanovtyń aıtýynsha, «Birjan sal» ulttyq kınomotagrafııanyń úlken bir belesi. Sebebi, sońǵy kezderde búgingi ómirge saı kınolardy túsirý qarqyn aldy. Qazaqtyń ulttyq óneri, salt-dástúri «Qyz Jibek» fılminen keıin, naq osy «Birjan sal» kınosynda kórsetildi. Birjan sal týraly kıno túsirý akterdiń ómirlik armany boldy. «Osy kartınamen Doshan óziniń óner salasyndaǵy úlken bir shyńyna shyqty ǵoı dep oılaımyn», - dedi depýtat.

Akterdyń ómirlik dostary men áriptesteriniń aıtýynsha, D.Joljaqsynov óziniń ónerin nasıhattaýmen eshqashan aınalyspaǵan, sondyqtan, bul bastamany dostary qolǵa alǵan. «Doshan prezentatsııa týraly biledi. Ol kisi kelispeı mundaı tusaýkeserdi ótkizbeýshi edik. Biraq ózin shaqyrmadyq. Sebebi, Talǵat ekeýimiz onyń jaqyn dostarymyz. Tusaýkeserdi ózimiz jasaǵan durys bolar dep oıladyq. Bizde óte kóp mereıtolar ótetinin bilesizder. Sahnaǵa shyǵyp alyp, eshkimge tór bermeıtin toı ıeleri de bar», - dedi T.Muhamedjanov.

Fılmder toptamasy 1000 dana tırajben shyqty. 2011 jyldyń 7 qazanynan bastap «Meloman» dúkender jelisine satylymǵa túsedi. Baǵasy da tómen - 1500 teńge. Biraq baspasóz máslıhatynyń spıkerleri DVD dıskiniń baǵasy tómen bolǵanymen, oǵan engen fılmderdiń baǵasy tómen dep qaramaý qajettigin aıtty. Sebebi, jobanyń maqsaty D.Joljaqsynov arqyly qazaq kınosynyń jemisi men jetistigin nasıhattaý bolyp tabylady.

«Bul jobadan eshkim paıda kórmeıdi. Qazir dıskiler qanshadan satylyp jatqanyn bilesizder. Onyń ústine 10 fılm mundaı baǵa turmaıdy. Muny halyq arzan kınolar dep qabyldamasa eken degen tilegimiz bar», - dedi V.Remnev.

«Jobaǵa nelikten naqty osy fılmder engeni týraly aıtyp óteıin. Doshan Qalıulynyń dos-jorandary osy joba arqyly qazaq kınosyn qol jetimdi deńgeıge jetkizýdi maqsat etti. Joba D.Qalıulyna birinshiden - tosyn syı. Ekinshiden bul - baǵasy qoljetimdi kollektsııalyq ónim. Joljaqsynov Qazaqstannyń halyq ártisi. Ókinishke qaraı, onyń qatysýymen túsirilgen fılmderdiń arasynda kópshilik halyqqa jetpeı jatqandary da bar», - V.Remnev.

V.Remnev, qazaqı bolmysty nasıhattaıtyn fılmder kınokartınalar ómirge kóptep kelip jatqan qazirgi jahandyq úrdiste, tasada qalyp qoımasa eken, degen tilegin de bildirdi.

Doshan Joljaqsynov 1951 jyly Shyǵys Qazaqstan oblysy Kúrshim aýdanynyń Aqsýat aýylynda dúnıege kelgen. 1969 jyly Qurmanǵazy atyndaǵy óner ınstıtýtynyń teatr fakýltetine túsip, onda KSRO halyq artısi Hadısha Bókeevadan (1969-1973) tálim aldy. 1972 jyldan bastap Ǵ.Músirepov atyndaǵy balalar jáne jasóspirimder teatrynda jumys jasady. 1993-2000 jj. aralyǵynda osy teatrdyń dırektory boldy. 1982 jyly Qazaqstan Lenındik komsomol syılyǵynyń laýreaty, 1996 jyly Qazaqstan Respýblıkasy Memlekettik syılyǵynyń laýreaty atandy. 1995 jyly QR Halyq ártisi ataǵy berildi.