Doshan Joljaqsynov Dúnıejúzilik «Qazaq kúresi» federatsııasynyń Qurmetti prezıdenti atandy
Alys-jaqyn shet elderdiń ókilderiniń qatysýymen elordada Dúnıejúzilik «Qazaq kúresi» federatsııasynyń halyqaralyq kongresi ótip jatyr. Jıyn barysynda federatsııa prezıdenti Alık Shpekbaev álemniń 27 elinen kelgen federatsııa múshelerine usynys bildirdi. Ol boıynsha federatsııanyń «Qurmetti prezıdenti» retinde Doshan Joljaqsynovty, birinshi vıtse-prezıdenti retinde Bádelhan Kamalhanulyn saılaý usynyldy. Kópshilik bir aýyzdan qoldady.
Jıynnyń kún tártibinde federatsııa alqa músheleriniń saılanýymen qatar, basqa da máseleler qarastyrylmaq.
Aıta keterligi, 2019 jyldyń 20-21 jeltoqsan aralyǵynda Nur-Sultanda qazaq kúresinen VIII Álem birinshiligi ótkiziledi. Oǵan 40-qa tarta memleketten 300-ge jýyq sportshy (erler men áıelder) qatysady. «Dáýlet» sport kesheninde ótetin baıraqty báseke barysynda erler (6 salmaq) men áıelder (6 salmaq) arasynda 12 salmaq dárejesinde júldeler sarapqa salynbaq. Álem birinshiliginiń saltanatty ashylýy joǵaryda atalǵan sport keshende 20-shy jeltoqsan kúni saǵat 16.00-ge josparlanǵan. Atalǵan Álem chempıonaty Birikken Kúres Áleminiń (United World Wrestling) 2019 jylǵa arnalǵan resmı kúntizbesine engen jáne jarystar tolyqtaı UWW resmı ókilderi men halyqaralyq dárejedegi tóreshileriniń qatysýymen ótkizilmek. El jankúıerleri «Qazsport» telearnasy arqyly dodaly jarystyń beldesýlerin tamashalaı alady.
Jarysty uıymdastyrýshylar – Birikken Kúres Álemi, Nur-Sultan qalasynyń ákimdigi, Dúnıejúzilik «Qazaq kúresi» federatsııasy. Álem chempıonaty «Eurasian Resources Group» (ERG) qoldaýymen ótkizilmek.
foto: voxpopuli.kz/history