«Dos-Muqasan» ansambli ánshisiniń basy daýǵa qaldy
NUR-SULTAN. QazAqparat - «Eır Astana» kompanııasy polıtsııaǵa «Dos-Muqasan» ansambliniń ánshisi Murat Qusaıynov óz qyzmetkerine qol kóterdi dep shaǵym túsirdi. Bul týraly «Eır Astana» korporatıvti kommýnıkatsııalar departamentiniń menedjeri Tilek Abrahmanov aıtty, dep habarlaıdy QazAqparat tilshisi.
«14 cáýirde «Nur-Sultan-Almaty» baǵytyndaǵy KS852 reısinen tártip buzǵan jolaýshy shyǵaryldy. Reıske otyrǵyzý kezinde M. Qusaıynov daýys kótere sóılep, balaǵat sózder aıtty. Ushý qaýipsizdigine qater tóndirýine baılanysty ekıpaj ony tasymaldaýǵa qabyldamaǵandyqtan, áýe kompanııanyń qyzmetkerleri kózinshe M. Qusaıynov qyzmet kórsetetin menedjerdiń mańdaıynan qatty uryp jibergen. Onyń densaýlyǵyna zaqym kelgen», - dedi Tilek Abrahmanov.
Osy oraıda, «Eır Astana» jolaýshylardyń áýe kompanııanyń qyzmetkerlerine qatysty quqyqqa qaıshy áreketterine tózbeıtinin, sondaı-aq jábirlengen qyzmetkerine jan-jaqty qoldaý kórsetetinin málimdedi.
«Áýe kompanııa Nur-Sultan qalasy áýejaıyndaǵy polıtsııanyń jelilik bólimshesine sotqa deıingi tergeý júrgizý jáne M. Qusaıynovty jaýapkershilikke tartý týraly tıisti aryzdy joldady», - dedi T. Abrahmanov.
Foto: anatili.kazgazeta.kz
