«Dos Kóshim: Ulttyń janashyry - sol ulttyń bar­lyq ókilderi dep bilemin» - baspasózge sholý

ASTANA. 8 maýsym. QazAqparat - «QazAqparat» agenttigi respýblıkalyq basylymdarda 8 maýsym, senbi kúni shyqqan ózekti materıaldarǵa sholýdy usynady.

***

Keshe Memleket basshysy Nursultan Nazarbaev otandyq telearnalardan zeınetaqy júıesin reformalaýǵa qatysty Qazaqstan halqyna úndeý jarııalady. «Egemen Qazaqstan» gazetiniń búgingi sanynda jaryq kórgen úndeýde: «Jalpy, men Úkimet pen Ulttyq banktiń jańa zeınetaqy zańnamasyn halyqqa túsindirý jónindegi jumysyna oń baǵa bere almaımyn. Birinshiden, osyndaı óte mańyzdy áleýmettik zań jobasy nemquraıly qaraldy. Ekinshiden, ony halyqqa keńinen nasıhat­taý isi durys júrgizilgen joq. Nátıjesinde, qazaqstandyq­tardyń kóbi zeınetaqy reformasynyń túpki mánin túsinbeı qaldy. Búginde zeınetaqy zańnamasyna ózgerister engizý kerek ekeni anyq! Bul - jahandyq úrdis. Eýropa odaǵy men álemniń ózge de elderi daǵdarys pen quldyraý jaǵdaıynda osylaı jasaýǵa májbúr boldy», - delingen. Sóıtip, Prezıdent qıyn túıindi tarqatty. Elbasymyz halyqqa Úndeý arnap, zeınetaqy reformasynyń qajettigin dáleldep aıtty, sonymen birge ony júzege asyrýdyń kókeıge qonymdy jolyn da kórsetti.

«Egemen Qazaqstan» gazetiniń jazýynsha, Atbasar aýdandyq soty men prokýratýra ǵımaratyna 6 maý­sym kúngi 03 saǵat 25 mınýtta belgisiz bireýler janǵysh zat quıylǵan shólmekter men tas laqtyrǵan. Osynyń saldarynan sot ǵımaratynda órt shyǵyp, eki qabatty úıdiń oń qanatyn jalyn sharpydy. Mekeme kúzetshisi bul týraly tıisti mekemelerge der kezinde habarlaǵan. Biraq, ol buzaqylardyń bet álpetin anyqtaýǵa múmkindik bolmaǵanyn aıtady. Oblystyq ishki ister departa­men­ti baspasóz qyzmetiniń jetek­shi­si Gúlnar Pınchýktiń málimdeýinshe, tótenshe jaǵdaı tún ortasynda oryn alǵandyqtan, zardap shekkender joq. Áıtse de sot tóraǵasynyń qyzmet bólmesi, májilis zaly, keńse men isterdi saraptaý bólmesine eleýli zaqym keltirilgen. Qolda bar qujattardyń birshamasy, 4,5 sharshy metr aýmaqtaǵy jıhazdar janyp ketken. Órtti aýyzdyqtaýǵa Atbasar qalasyndaǵy órt sóndirý qyzmetiniń úsh arnaıy tehnıkasy men bes adamdyq brıgada jumyldyrylypty. Aqparat «Tekserý jumystary atqarylýda» degen taqyryppen berilgen.

***

«Aıqyn» gazetiniń búgingi sanynda «Ult taǵdyry» qoǵamdyq qozǵalysynyń tóraǵasy Dos Kóshimmen aradaǵy suhbat «Ulttyń janashyry - sol ulttyń bar­lyq ókilderi dep bilemin» degen taqyryppen berilgen. Basylym tilshisiniń barlyq saýalyna tuşymdy jaýap bergen ol : «Bizdiń qoǵamnyń tildik belgisine qa­rap ekige jarylǵany da eshkimdi tańǵaldyrmaıdy. Bir shańyraqtyń as­tynda ómir súrip jatqan orystildi qaýym men qazaqtildi qaýymnyń oqı­tyn kitaby da, kóretin kınosy men ha­barlary da, áńgimeleriniń taqy­ryp­tary da ártúrli. Kerek deseńiz, biz­der ártúrli oqıǵalarǵa túrli baǵa beremiz (ásirese, Shańyraq oqıǵasyna, Jeltoqsanǵa, nemese Jańaózen oqı­ǵasyna ekitildik ortanyń bir-biri­ne qarama-qarsy pikir bildirgeni bárimizdi de oılandyrýy kerek.) Birtildik qaýym­nyń durys degeni ekinshisi úshin teris degen baǵa alady... Bul áral­ýandyq maqsat birligine alyp ke­ledi dep eshkim de aıta almaıtyn bo­lar. Ásirese, qazaq ultynyń ózek­ti máselelerine, onyń sheshilý jol­da­ryna degen orystildi qaýymnyń kóz­qarasy syn kótermeıdi. Bul tek «Lad» ne «Slavıan, orys jáne kazak uıym­­da­rynyń asssotsıatsııasy» sııaqty bir­di-ekili uıymdardyń úndeýlerinen emes, qarapaıym adamdarmen pikir­les­kende de ashyq kózge túsedi. Jer-sý ataý­laryn ózgertip, tarıhı ataýlaryn qaı­tarý máselesinen bastap, qazaq mek­tepterin ashý máselesine deıin biz­­diń aldymyzdan túsinistik pen qol­daý­­dyń ornyna únsiz, dálelsiz, ishki qar­­sylyq shyǵady. Árıne, múmkin, me­niń bul jeke pikirim - tym qatań baǵa bo­lar, biraq aýrýyn jasyrǵan...», - dedi.

«Keshe elimizdiń Bas prokýrorynyń birinshi orynbasary Iogan Merkel Meshimbaeva hanymnyń Reseıde «bosqyn mártebesin» suraýy múmkindigin de joqqa shyǵarmady. Bul kúni Astanada postkeńestik keńistik elderi prokýrorlarynyń sammıti ótken bolatyn. TMD-ǵa qatysýshy memleketterdiń bas prokýratýralarynyń halyqaralyq qurylymdary basshylarynyń kezdesýine soltústik kórshimizden kelgen delegatsııa ókilderi bul taqyrypqa túsinikteme bermedi. Óıtkeni bul másele kóshi-qon qyzmetiniń quzyryna jatatyn kórinedi», - dep jazady «Aıqyn» gazeti.

«Meshimbaevanyń ózin Qazaqstanǵa berý týraly sheshimge Reseı Fede­ra­tsııasynyń aýdandyq sotynan bastap, Joǵarǵy sotyna deıin qarsylyq bildirýge quqy bar. Bul belgili bir ýaqytty qajet etedi. Buǵan qosa, A.Meshimbaeva Reseıdiń quzyrly organ­daryna júginip, ózine bosqyn mártebesin berýdi suraı alady. Bul da belgili bir ýa­qytqa sozylady», - dedi I.Merkel.