Dorın Rechan Moldovanyń jańa premer-mınıstri boldy

ASTANA. QazAqparat – Moldova Prezıdenti Maııa Sandýdyń qorǵanys jáne ulttyq qaýipsizdik jónindegi keńesshisi Dorın Rechan eldiń jańa premer-mınıstri bolyp taǵaıyndaldy, dep habarlaıdy QazAqparat Euronews-ke silteme jasap.

Dorın Rechan 2012-2015 jyldary Moldovanyń ishki ister mınıstrligin basqarǵan. BAQ-ta jarııalanǵan aqparatqa sáıkes, úkimetke barǵanǵa deıin Rechan TeleMedia Group marketıng bóliminiń dırektory bolǵan. Sondaı-aq, Kásiporyndardy qaıtaqurylymdaý men kómek kórsetý agenttigi jobalarynyń menedjeri qyzmetin atqardy. 2022 jylǵy aqpanda Rechan memlekettik qyzmetke oralyp, memleket basshysynyń keńesshisi laýazymyn atqaryp keldi.

Buǵan deıin habarlaǵanymyzdaı, Moldova premer-mınıstri Natalıa Gavrılıtsa juma kúni qyzmetinen ketetinin málimdegen edi. Maııa Sandý Gavrılıtsa bastaǵan el úkimetiniń otstavkasyn qabyldady.