Dopty hokkeıden Oraldyń «Aqjaıyǵy» sońǵy oıynynda iri eseppen jeńiske jetti

ORAL. QazAqparat – Dopty hokkeıden joǵary lıga komandalary arasynda Reseı chempıonatynda Oraldyń «Aqjaıyǵy» sońǵy oıyndaryn Pervoýralskide jergilikti «SKA-Sverdlovsk» komandasymen ótkizdi, dep habarlaıdy QazAqparat tilshisi.

Keshe ótken alǵashqy kezdesýde aıdyn ıeleri 7:6 esebimen basym tústi.

Bul oıynda «Aqjaıyqtyń» surmergeni, reseılik Maksım Pahomov het-trıktiń avtory atandy. Reseılikter Artem Lapshın men Aleksandr Slýgın, sondaı-aq Oral dopty hokkeıiniń túlegi Dáýren Oralov bir-birden kózge tústi.

Búgingi matchta Nıkolaı Shavaldınniń shákirtteri 10:2 esebimen ese qaıyrdy. Bul joly A.Slýgın qarsylastyń qaqpasyna 4, M.Pahomov 3, A.Lapshın 2 dop engizdi. Taǵy bir gol Bolat Muhıttyń enshisinde.

Osylaısha, oraldyqtar 2022-2023 jylǵy maýsymda úshinshi topta tórtinshi orynmen qorytyndylady.

Eske sala keteıik, budan buryn «Aqjaıyqtyń» kósh basyndaǵy komandaǵa jol bergenin jazǵan bolatynbyz.