Dopty hokkeıden Qazaqstan quramasyna «Aqjaıyqtan» úsh oıynshy alynyp otyr
ORAL. QazAqparat - Dopty hokkeıden Qazaqstan ulttyq quramasyna «Aqjaıyq» komandasynan úsh birdeı oıynshy alynyp otyr, dep habarlaıdy «QazAqparat» tilshisi.
«Aqjaıyq» sport klýbynyń dırektory Azamat Shaıhynyń aıtýynsha, oraldyq komandanyń kapıtany, shabýylshy Maksım Ótebalıev, jartylaı qorǵaýshy Sultan Qadyrjanov jáne qaqpashy Narıman Takırov el namysyn qorǵaıtyn bolady.
Dopty hokkeıden bıylǵy álem chempıonaty 29 qańtar - 4 aqpan aralyǵynda Reseıdiń Habarovsk qalasynda ótedi.
Qazaqstan quramasyndaǵy bir jańalyq, bapkerleri de ózgerdi. Alekseı Nıkıshov ketip, qurama tizginin belgili qaqpashy, Reseıdiń eńbek sińirgen sport sheberi, 2013 jyldan Reseı quramasynyń jattyqtyrýshylar shtabynda bolǵan Ilıas Handaev aldy. Onyń ákesi Igor Handaev ta - belgili hokkeıshi, kezinde Almatynyń «Dınamosynda» oınaǵan. Qazaqqa jaqyndyǵy bar Ilıas Handaevqa oraldyq bapker Nıkolaı Shavaldın kómektesedi.
«Bizdiń hokkeıshiler 24 qańtar kúni attanyp, Orynbor arqyly Máskeýge barady. Sodan keıin quramaǵa qosylyp, jattyǵady», dedi «QazAqparat» tilshisine A.Shaıhy.
Aıta keteıik, Qazaqstan quramasy budan buryn dopty hokkeıden álem birinshiliginiń alty dúrkin qola júldegeri atanǵan bolatyn. Sondaı-aq negizin «Aqjaıyq» oıynshylary quraǵan komanda 2011 jyly qysqy Azıadada top jardy.
