Dopty hokkeıden Qazaqstan quramasyna «Aqjaıyqtan» úsh birdeı oıynshy shaqyrylyp otyr

Qazaqstan quramasynyń komanda bastyǵy, belgili hokkeıshi, halyqaralyq dárejedegi jáne elimizdiń eńbek sińirgen sport sheberi Marat Mańǵýbaevtyń QazAqparat tilshisine málim etkenindeı, aldaǵy jylǵy qańtardyń 24-31-i aralyǵynda Máskeýde dopty hokkeıden kezekti álem chempıonaty ótedi. Oǵan Aleksandr Ionkın baptaıtyn Qazaqstan quramasy da qatysady. «Aqjaıyqtan» komanda kapıtany Vladıslav Novojılov, qaqpashy Іlııas Haırekeshev jáne jas shabýylshy Eskendir Nuǵymanov shaqyrylyp otyr. Oraldyq hokkeıdiń túlegi Raýan Isalıev Arhangelskide, Denıs Maksımenko Nıjnıı Novgorodta sheberlikterin shyńdaýda. Reseıdiń Kemerovo, Irkýtsk, Habarovsk, Kırov syndy qalalarynda da joǵary topta Qazaqstan quramasynyń oıynshylary óner kórsetip júr.

Sonymen qatar 2011 jylǵy qysqy Azııa oıyndary da qyr astynda tur. Onda dopty hokkeıden el namysyn negizinen «Aqjaıyq» komandasynyń oıynshylary qorǵaıdy.