Dopty hokkeıden fınal: «Aqjaıyq» ekinshi jeńisine qol jetkizdi
ORAL. QazAqparat – Krasnoıarsk qalasynda dopty hokkeıden joǵary lıga komandalary arasynda ótip jatqan búkilreseılik jarystyń fınaldyq týrnırinde «Aqjaıyq» ekinshi jeńisine qol jetkizdi, dep habarlaıdy QazAqparat tilshisi.
Oraldyqtar A tobynda búgin «Vodnık-2» (Arhangelsk) komandasymen aıdynǵa shyqty.
Tartysty ótken matchta «Aqjaıyqtyń» surmergeni, reseılik shabýylshy Maksım Pahomov esep ashty. Áıtse de qarsylas komandadan Nıkıta Baev pen Dmıtrıı Gnıbeda qatarynan eki gol soqty. Degenmen M.Pahomov 12 metrlik aıyp dobyn dál oryndady – 2:2. Budan keıin M.Pahomov «Aqjaıyqty» alǵa shyǵarǵanymen, Arsenıı Kozlov tarazy basyn teńestirdi – 3:3.
Ekinshi taımda «Vodnık-2»-den Danııl Baev, «Aqjaıyqtan» reseılik legıoner Aleksandr Slýgın kózge tústi. Budan keıin oraldyqtardyń kapıtany Maksım Ótebalıev oıyn tizginin qolǵa aldy. Onyń golyna A.Kozlov jaýap qaıyrǵanymen, match aıaqtalýyna 10 mınýttaı ýaqyt qalǵanda, Maksım jeńis dobyn soǵyp ketti.
Esep – 6:5, «Aqjaıyqtyń» paıdasynda.
Osylaısha Nıkolaı Shavaldınniń shákirtteri fınaldyq týrnırde úsh kezdesýdiń ekeýinde qarsylastarynan basym tústi.
Jarys jalǵasýda.
Eske sala keteıik, budan buryn «Aqjaıyqtyń» ekinshi kezdesýinde jeńilip qalǵanyn jazǵan bolatynbyz.
