Dopty hokkeıden Almatyda ótetin Álem chempıonatyna Mońǵolııa quramasy qatyspaıtyn boldy
ALMATY. 25 qańtar. QazAqparat /Erlik Erjanuly/ - 29-qańtar men 5-aqpan aralyǵynda dopty hokkeıden Almatyda ótetin Álem chempıonatyna 14 el qatysatyn boldy.
QR Dopty hokkeı federatsııasynyń bas hatshysy Vladımır Savchenko búgin baspasóz máslıhatynda osylaı málim etti.
Bul dúbirli dodaǵa alǵashqy kezde 18 memleket qatysady dep josparlanǵan bolatyn. Keıin olardyń ótinish bergenderi 15-ke deıin azaıǵan edi. V. Savchenkonyń aıtýynsha, keshe jarysty uıymdastyrýshylarǵa Mońǵolııa quramasy da Álem chempıonatyna qatysýdan bas tartatynyn málimdegen. Qonaqtardyń arasynan dúısenbi kúni Almatyǵa eń birinshi bop Reseı sportshylary kelgen edi. Erteń endi olardyń qataryna Shvetsııa quramasy qosylmaq. Ótken jyly Álem chempıony atanǵan reseılikterdiń bas bapkeri Sergeı Fırsovtyń paıymdaýynsha, bıyl basty qarsylasy shvedter bolmaq. Sondaı-aq ótken jylǵy kúmis júldeger sanalatyn Fınlıandııa men jarys qojaıyny sanalatyn Qazaqstan quramalary da negizgi úmitkerler bolyp otyr.
