Dopty hokkeıden álem chempıonatyna Qazaqstan quramasy qatysady
ORAL. QazAqparat - Reseıdiń Habarovsk qalasynda 29 qańtar - 4 aqpan aralyǵynda ótetin dopty hokkeıden kezekti álem chempıonatyna Qazaqstan quramasy da qatysady, dep habarlaıdy «QazAqparat» tilshisi.
«Aqjaıyq» sport klýbynan túsken málimetke qaraǵanda, Qazaqstan quramasyn bıyl belgili reseılik maman Ilıas Handaev jattyqtyrady. Oǵan oraldyq bapker Nıkolaı Shavaldın kómektesedi.
V tobynda Qazaqstan quramasy 29 qańtar kúni betashar kezdesýin «Erofeı» arenasynda Vengrııa quramasymen ótkizedi. Sodan keıin 30 qańtarda AQSh, kelesi kúni Germanııa quramasymen oınaıdy. Eger óz tobynda qazaqstandyqtar úzdik shyqsa, onda kúshtilerdiń A tobynda (Shvetsııa, Reseı, Fınlıandııa, Norvegııa) sońǵy, tórtinshi orynǵa ıe bolǵan komandamen 2 aqpan kúni shırek fınaldyq básekesin ótkizedi. Onda jeńse, júlde úshin talasady.
Aıta keteıik, Qazaqstan quramasyna dopty hokkeıden joǵary lıga komandalary arasynda búkilreseılik jarysta óner kórsetetin Oraldyń «Aqjaıyǵynan» komanda kapıtany, shabýylshy Maksım Ótebalıev, qaqpashy Narıman Takırov, jartylaı qorǵaýshylar Sultan Qadyrjanov, Andreı Gýşın, Petr Grıbanov syndy oıynshylar shaqyrylǵan bolatyn. Sonymen qatar dúnıejúzilik dodada el namysyn qazirgi kezde ár jaqta júrgen Oral dopty hokkeıiniń túlekteri, shabýylshy Raýan Isalıev, qorǵaýshy Denıs Maksımenko, jartylaı qorǵaýshylar Leonıd Bedarev, Eskendir Nuǵmanov qorǵaıdy.
Buǵan deıin álem birinshiliginiń alty márte qola júldegeri atanǵan Qazaqstan quramasy úshin ótken jylǵy doda sátsiz bolǵan edi. Shvetsııanyń Sandvıken qalasynda ótken chempıonatta Qazaqstan quramasy shırek fınalda ózderiniń basty qarsylasy - Norvegııa eliniń ókilderin 4:0 esebimen jeńip turyp, utylyp qalǵan-dy. Sóıtip únemi júlde úshin talasqa túsetin qazaqstandyqtar mundaı múmkindikten aıyrylyp qalǵan bolatyn. Bıyl I.Handaevtyń shákirtteri sol olqylyqtyń ornyn toltyrý úshin kúsh salady.
